«Barystyń» jeńis serııasy úshke jetti

ASTANA. 29 qańtar. Astanalyq «Barys» óz aıdynynda reseılik «Severstaldi» qabyldap, qosymsha kezeńde 3:2 esebimen jeńiske jetti. Bul týraly egemen.kz habarlady. Oıyn qos taraptyń alma-kezek shabýylymen bastaldy. «Barys» sapynan birinshi bestik belsendilik tanytty. Kezdesýdiń 11-mınýtynda Nadjel Doýs pen Dastın Boıd uıymdastyrǵan shabýyldan nátıje shyǵarǵan Maık Landın esep ashty. Arada eki mınýt ýaqyt ótkende aıdyn ıeleri oıynshy basymdyǵyna ıe boldy. Degenmen, bul múmkindikti Andreı Nazarov shákirtteri paıdalana almady. Esesine oıynnyń 16-mınýtynda qonaqtar esepti teńestirip ketti. Mergendigimen kózge túsken – Pavel Chernov. Ekinshi kezeńde bizdiń komanda eki márte aıdynda 4 oıynshymen qaldy. Abyroı bolǵanda ekeýinde de reseılikter qorǵanysymyzdy buza almady. Úziliske 5 mınýt qalǵan kezde qonaqtar qarqynyn kúsheıtip, bizdiń qaqpaǵa lap qoıdy. Sondaı shabýyldardyń birinde «Severstal» oıynshysy Maksım Trýnev kók jolaqtan enip baryp, joıqyn soqqy jasady. Qaqpashymyz Pavel Polýektov shaıbanyń jaqyn buryshqa kele jatqanyn dál baǵamdaǵanymen, soqqyǵa tosqaýyl bola almady. Nátıjesinde esep 1:2 bolyp, qarsylastyń paıdasyna ózgerdi. Sheshýshi kezeńde elordalyq ujym esepti teńestirý úshin shabýyldaryn kúsheıtti. Qonaqtar ózderine qajetti nátıjege qol jetkizgendikten negizinen qorǵanysqa kóńil bólip, qarymta shabýylǵa ǵana ıek artty. Desek te, oıynnyń aıaqtalýyna 28 sekýnd qalǵan kezde «Barystyń» birinshi bestigi tamasha shabýyl uıymdastyryp, Roman Starchenko komandasynyń ekinshi shaıbasyn soqty. Nátıjeli shabýylǵa uıytqy bolǵan taǵy da N.Doýs pen D.Boıd ekenin aıta ketken jón. Negizgi ýaqytta jeńimpazdy anyqtaı almaǵan qarsylastar 5 mınýttyq qosymsha kezeńge júgindi. Atalmysh kezeń «Severstaldiń» shabýylymen bastalǵan bolatyn. Alaıda, der kezinde es jııa bilgen «Barys» oıynshylary 2-mınýtta úshinshi shaıbany soǵyp, qarsylastarynan jeńisti julyp aldy. Jeńis shaıbasynyń avtory N.Doýs bolsa, oǵan nátıjeli pas shyǵarǵan Dmıtrıı Ýpper. Bul «Barystyń» qatarynan úshinshi jeńisi. Ázirge Shyǵys konferensııasynda 74 upaımen 6-orynǵa nyq taban tirep tur. Al sońǵy bes oıynnyń tórteýinde jeńilgen «Severstal» 63 upaımen Batys konferensııasynyń sońynda, ıaǵnı, 14 komandanyń ishinde 13-shi keledi. «Barystyń» kelesi qarsylasy QHL-dyń qazirgi kóshbasshysy máskeýlik SSKA. Atalǵan tartys 30 qańtar kúni Astana qalasyndaǵy «Qazaqstan» sport kesheninde ótedi. Elaman Qońyr. Derek: egemen.kz. Sýret: hcbarys.kz.