Elbasy Premer-Mınıstr laýazymyna Kárim Másimovti usyndy

ASTANA. 29 sáýir. Elbasy Parlament Májilisindegi fraksııa basshylarymen kezdesti. Kezdesýde Memleket basshysy Qazaqstan Prezıdenti Premer-Mınıstr laýazymyna Kárim Másimovtiń kandıdatýrasyn usyndy. Bul týraly akorda.kz habarlady. Qazaqstan Prezıdentiniń laýazymyna kirisýine baılanysty el Úkimeti óz ókilettigin doǵardy, sondaı-aq, Prezıdentke tikeleı baǵynystaǵy jáne oǵan esep beretin memlekettik organdar basshylary, Astana men Almaty qalalarynyń jáne oblystardyń ákimderi ókilettigin toqtatty. Memleket basshysy el aldyna qoıylǵan mindetterdi júzege asyrý qajettiligin eskere otyryp, Úkimettiń bastalǵan jumysty jalǵastyrǵany jón ekenin atap ótti. Osyǵan baılanysty Qazaqstan Prezıdenti Premer-Mınıstr laýazymyna Kárim Másimovtiń kandıdatýrasyn usyna otyryp, Úkimet pen Parlamenttiń úılesimdi jumysynyń mańyzdy ekenin aıtty. «Halyq kommýnısteri» depýtattyq fraksııasynyń jetekshisi Vladıslav Kosarev bul sheshim jan-jaqty salmaqtalǵanyn ataı kele, qoldaý bildirdi. Qazaqstannyń «Aq jol» demokratııalyq partııasy fraksııasynyń basshysy Azat Perýashev usynysty qoldap, Kárim Másimovtiń daǵdarysqa qarsy basqarý tájirıbesine nazar aýdardy. «Nur Otan» fraksııasynyń basshysy Darıǵa Nazarbaeva da usynysty qoldady jáne depýtattar men Úkimet arasynda qalyptasqan syndarly qarym-qatynas olardyń ózara is-qımylyna oń yqpal etetinin atap ótti. Elaman Qońyr. Derek: akorda.kz. Sýret: inform.kz.