Túrki qaǵanatynan bastap, qarahan, qarlyq, oǵyz jáne qypshaqtardyń tarıhyn indete zerttep, tarıh ǵylymyna súbeli olja salǵan ǵalymnyń búginge deıin 20-dan asa monografııasy, 200-ge jýyq ǵylymı maqalasy jaryq kórgen. Ásirese tarıhshynyń «Qarlyq-Qarahan memleketiniń tarıhy», «Qarqaraly-Qazylyq», «Abaı jáne uly dala tulǵalarynyń muralary: órkenıettik sabaqtastyq» atty eńbekterin aýzy dýaly ǵalymdar joǵary baǵalaǵan.
Konferensııa mereıtoı ıesin quttyqtaýmen bastaldy. Aldymen Ǵylym jáne joǵary bilim mınıstrliginiń ókili mınıstr Saıasat Nurbektiń quttyqtaý hatyn oqyp berdi. Odan keıin L.N.Gýmılev atyndaǵy Eýrazııa ulttyq ýnıversıtetiniń rektory, akademık Erlan Sydyqov pen «Qazaq gazetteri» JShS bas dırektory, akademık Dıhan Qamzabekuly izgi lebizderin bildirdi. Al Parlament Májilisiniń depýtaty, professor Erkin Ábil Joshy ulysynyń bos jerden paıda bolmaǵanyn aıta kelip: «Onyń negizin Túrki memleketteri qalady. Osy Túrki memleketterin zertteýge barlyq sanaly ǵumyryn arnaǵan ǵalymnyń biri – Sataı Syzdyqov. Sondyqtan ulttyq sanamyzdy qalyptastyratyn osyndaı taǵylymdy is-sharanyń ǵylymı ǵana emes, saıası da máni bólek», dep tarıhshynyń tyń izdenisterine toqtaldy. Is-sharaǵa alystan at arytyp kelgen Tájikstan ulttyq ýnıversıtetiniń dosenti Rahmoıl Safarov bastaǵan delegasııa ókilderi ǵalymnyń Qarlyq memleketiniń tarıhyn zerttegen eńbegine laıyqty baǵa berip, mereıtoı ıesiniń ıyǵyna shapan japty. Al konferensııa barysynda ǵalymdar plenaralyq jáne seksııalyq májiliske bólinip, baıypty baıandamalar jasady. Sondaı-aq is-shara aıasynda Sataı Maqsutulynyń «Qazylyq» atty tórt tomdyǵy tanystyryldy.
