Talantty balalar tasada qalmaıdy

Derekke júginsek, munda 102 bala tárbıelenip jatyr eken. Basqosý barysynda Ǵanı Bektenuly býyny bekip, qanaty qataımaı jatyp taǵdyrdyń túrli synaǵyna tap bolǵan jasóspirimdermen tildesip, olardyń qajettilikterine nazar aýdar­dy. Mınıstr óz sózin­de ár balanyń quqyǵyn qorǵaý­dyń mańyzdylyǵyn atap ótip, qaýip­siz orta qalyptastyrý qajet­tigin til­ge tıek etti. Sondaı-aq jer­gi­lik­ti atqarýshy bılik ókilderine ádis­temelik qyzmetter men óńir­lik pe­dagogıkalyq qol­daý ortalyq­tary­nyń qyz­metin kúsheı­týdi tapsyrdy.

«Balalardyń qaýipsizdigin qam­ta­masyz etý jáne olardyń quqy­ǵyn qorǵaý – memleket saıasatynyń basty baǵyty. Elimizdegi árbir bala ózin eresek adamdardyń qamqor­lyǵynda ekenin sezinýi kerek. Ol úshin barlyq ýákiletti organdar óz mindetin minsiz atqaryp, jergilikti jerde jumysty durys úılestirgeni lázim.

Prezıdent tapsyrmasy boıyn­sha osy jyldan bastap, bar­lyq óńirde psıhologııalyq qol­daý orta­lyǵy ashyldy. Psıho­log maman­dardyń jumysyn kú­sheı­­te otyryp, balalar quqy­ǵy­n­yń buzylýyna qatysty jaıt­tar­dyń aldyn alǵan jón dep bi­lemin. Osy tusta balalardy jal­py­­ulttyq qundylyq rýhynda tár­bıeleýge baǵyttalǵan «Birtutas tárbıe» baǵdarlamasy negizgi ról atqaratynyn umytpaǵan abzal», dedi mınıstr óz oıyn ortaǵa salyp.

Keıinnen «Baqytty bolashaq» oqýshylar saraıynda ótken kezdesýde mınıstr bilim alýshylarmen erkin formatta áńgime-dúken qurdy. Bilim salasynda qolǵa alynǵan jańashyl bastamalar men oqýshylardy qoldaý baǵytynda qolǵa alynǵan jumystar týraly áńgimeledi. Ǵ.Beısembaevtyń aıtýynsha, bolashaqta bilim básekelerinde top jarǵan oqýshylarǵa qurmet kórsetilip, qarjylaı syıaqy taǵaıyndalady.

«Bilimdi urpaq – el erteńiniń kepili. Bılik bilimdi oqýshylardy árqashan qoldaýǵa da­ıyn. Endi halyqaralyq olımpıadada top jar­ǵan jeńimpazdar men júldeger­ler qomaqty qarjylaı syıaqy alady. Bul – bilim jarystaryna qyzyǵýshylyqty arttyryp, úzdikterdi yntalandyrý maqsatynda qolǵa alynǵan jumys. Máselen, halyqaralyq olımpıadalarda jeńiske jetken oqýshylarǵa birjolǵy syıaqy retinde 5,5 mıllıon teńgege deıin qarastyrylǵan. Sonymen qatar jeńimpazdarǵa otandyq joǵary oqý oryndarynyń granttary tabystalady. Osylaısha, daryndy jastarǵa úlken qoldaý kórsetilip, olardyń bilimi men jetistikteri laıyqty deńgeıde baǵalanady. Jeńimpazdardy daıyn­daǵan pedagogterdiń de eńbegi eleýsiz qalmaıdy», dedi mınıstr.

Memleket basshysy Qasym-Jomart Toqaevtyń tikeleı tapsyrmasyna sáıkes, bilimdi ári básekege qabiletti jastardyń qataryn artty­rý maqsatynda respýblıka boıynsha ilkimdi is­ter qolǵa alynǵan. Aıtalyq, sońǵy 5 jyldyń ishin­de elimizde 1 mıllıon oqýshyǵa arnalǵan bir myń­nan asa mekteptiń qurylysy qarqyn aldy. Bu­dan bólek, barlyq bilim oshaǵyn «Jaıly mektep» deń­geıine jetkizý boıynsha júıeli ju­mys­­tar at­qarylyp jatyr. Nátıjesinde, 2027-2028 jylǵa deıin elimizdegi barlyq mekteptiń ınf­ra­qurylymy jaqsaryp, oqýshylar joǵary jyl­dam­dyqty ınternet pen zamanaýı úlgide pándik ka­bınetterge qol jetkizbek. Osyndaı málimetter­men bólisken Ǵanı Beısembaev árbir pe­­dagog óz mamandyǵyna adaldyq tanytyp, urpaq tár­bıe­leý isine úlesterin qosýy qajettigin jetkizdi.

Oqý-aǵartý mınıstri Ǵanı Beısembaev, oblys ákiminiń orynbasary Serik Sálemov, oblystyq bilim basqarmasynyń basshysy Raýan Sadyrqulovtyń qatysýymen ótken kezdesýge qatysýshylar spıkerlerge kókeıde júrgen saýaldaryn qoıyp, utymdy jaýaptar aldy.

Jambyl oblysy