Kitaphananyń ashylýynda sóz sóılegen Ǵylym jáne joǵary bilim mınıstri Saıasat Nurbek: «Shyn máninde búgin – aıtýly kún. Kez kelgen bilim oshaǵynyń júregi – ol kitaphana. Eń joǵary standartta jasalǵan, eń myqty elektrondyq, sıfrlyq platformalary bar bul Ǵylymı kitaphana stýdentter men oqytýshylar, jalpy kitapsúıer qaýym úshin bilimderin arttyrýǵa baǵyttalǵan myqty ortalyq bolaryna senimim mol», dep atap ótti.
Seraly Qanıuly – Qazaq ulttyq qyzdar pedagogıkalyq ýnıversıtetiniń damýyna úlken úles qosqan ardaqty ustaz, belgili ǵalym, fızıka-matematıka ǵylymdarynyń kandıdaty, dosent, Qazaq SSR aǵartý isiniń úzdigi, KSRO joǵary mektebiniń úzdigi, eńbek ardageri. 40 jylǵa jýyq Qazaq qyzdar pedagogıkalyq ınstıtýtynda qyzmet etip, myńdaǵan shákirt tárbıeledi.
Kitaphananyń saltanatty ashylý rásimine Almaty qalasynyń ákimi Erbolat Dosaev, Qazaq ulttyq qyzdar pedagogıkalyq ýnıversıtetiniń basqarma tóraǵasy-rektory Gúlmıra Qanaı jáne ustazdyń jaqyn týystary da qatysty.
Almaty qalasynyń ákimi Erbolat Dosaev bul kitaphana bilim men mádenıettiń naǵyz ortalyǵy ekenin atap ótse, ulaǵatty ustazdyń kelini Janat Derbısalına ýnıversıtet ujymyna alǵysyn bildirip, «Ákemizge osyndaı qurmet kórsetilip jatqanyna óte qýanyshtymyz. Ol kisiniń esimi ýnıversıtet qabyrǵasynda, júregimizde máńgilikke saqtalady», dedi.
Is-shara aıasynda QR Ǵylym jáne joǵary bilim mınıstri Saıasat Nurbek Seraly Qanıevtyń uly Berik Qanıevke kitaphananyń ashylýyna zor úles qosqany úshin Alǵys hat tabystady. Sonymen qatar Qazaq ulttyq qyzdar pedagogıkalyq ýnıversıtetiniń basqarma tóraǵasy-rektory Gúlmıra Qanaı da rızashylyǵyn bildirip, zamanaýı jabdyqtalǵan kitaphana stýdentterdiń sapaly bilim alýyna zor yqpal etetindigin atap ótti.
Kitaphana stýdentter, oqytýshylar jáne zertteýshiler úshin zamanaýı bilim beretin mádenı ortalyqqa aınalady. Munda olar ǵylymı qorlarmen jumys istep, oqý jáne zertteý jumystaryn júrgizý úshin eń sońǵy tehnologııalardy paıdalana alady. Jańa kitaphana keńistigi yńǵaılylyq pen jaılylyqty eskere otyryp jobalanǵan. Onda toptyq jáne jeke jumystarǵa arnalǵan alańdar bar. Sondaı-aq ozyq jabdyqtar men elektrondyq resýrstar qoljetimdi.
Is-sharada qonaqtar jańartylǵan kitaphana ǵımaratyna ekskýrsııa jasap, bilim berý sapasyn arttyrýǵa baǵyttalǵan jańalyqtarmen tanysty.
