Massaget.kz tilshisi jazǵandaı, qazaqstandyq iri bankterdiń biriniń kredıttik kalkýlıatorynda nesıege 12 aıǵa 1 mıllıon teńgeni alatyn bolsaq, eki tólem mólsheri kórsetiledi. Eger:
- annýıtettik óteýdi tańdaıtyn bolsańyz, aı saıynǵy tólem 92 635 teńge;
- teń úlestermen óteýdi tańdaıtyn bolsańyz, aı saıynǵy tólem 100 myń teńge.
Ekeýiniń aıyrmashylyǵy aıtarlyqtaı seziledi, sondyqtan klıentter ádette annýıtetti tańdaıdy.
Annýıtet - nesıeni teń tólemdermen óteý tásili, ıaǵnı siz aı saıyn bankke bir somany tóleısiz, biraq ol somanyń ishinde negizgi qaryz ben qaryzdyń qaldyǵyna eseptelgen paıyz bar. Nátıjesinde, nesıe óteý kezinde alǵashqy aılardaǵy tólem paıyzdy jabady. Ýaqyt óte kele tólemdegi negizgi qaryzdyń úlesi artady, al paıyz úlesi tómendeıdi. Sonymen bastapqy ýaqytta aı saıynǵy tólemniń kóp úlesin paıyz alady, sodan keıin negizgi qaryz esepteledi.
Al teń úlestermen tólem múldem basqasha jumys isteıdi. Munda aı saıynǵy tólem mólsherinde negizgi qaryzdyń alatyn úlesi saqtalady. Sondyqtan paıyzǵa baılanysty nesıeniń alǵashqy aılaryndaǵy tólem somasy joǵary bolady. Iаǵnı aı saıynǵy tólem birtindep azaıady, óıtkeni bul jaǵdaıda siz negizgi qaryzdy teń úlespen óteısiz jáne negizgi qaryzdyń qaldyǵyna eseptelgen paıyzdy tóleısiz. Osylaısha siz aı saıyn bankke negizgi qaryzdyń birdeı somasyn, sondaı-aq paıyzdardyń belgili bir somasyn aýdarasyz, sonda paıyz somasy aı saıyn azaıady.
Eń qyzyǵy teń úlestermen alynǵan nesıeniń artyq tólemi annýıtetke qaraǵanda tómen.
Al bankter nesıelek kalkýlıatorda alǵashqy aı saıynǵy tólemdi eshqandaı túsiniktemesiz kóbeıtip qoıady, saldarynan adamdar tólem mólsherinen qorqyp, teń úlestermen tóleý tıimsiz, al annýıtet tıimdi dep oılaıdy.
Biraq aıta keteıik, nesıeni óteý shemalarynyń árqaısysynyń ózindik artyqshylyqtary men kemshilikteri bar. Sondyqtan klıenttiń ózi jeke qajettilikterin eskerip, salystyryp, nesıeni óteýdiń tıimdi tásilin tańdaýy kerek.
Annýıtettiń erekshelikteri:
Aı saıynǵy tólem birdeı bolady, bul bıýdjetti josparlaý turǵysynan yńǵaıly;
Nesıeleý merziminiń basynda aı saıynǵy tólem teń úlestik nesıege qaraǵanda az bolady, eger nesıe somasy úlken bolsa jáne tólemdi qaltańyz kótermese, bul mańyzdy;
Annýıtet boıynsha alynǵan nesıede artyq tólem kóbirek bolady.
Teń úlestermen tóleýdiń erekshelikteri:
Alǵashqy aılarda aı saıynǵy tólem joǵary bolady, biraq ol birtindep azaıady. Sóıtip ýaqyt óte kele nesıe júktemesi aıtarlyqtaı tómendeıdi;
Artyq tólemniń jalpy somasy annýıtettik óteý tásilimen alynǵan nesıege qaraǵanda tómen bolady;
Qaryz teń úlestermen óteletindikten jáne paıyz qaryzdyń qalǵan bóligine esepteletindikten, "kesteden tys" kez kelgen tólem únemdeýge múmkindik beredi.
