Sýret: pavon.kz
– О́ńirge qatty aıaz áli jete qoıǵan joq. Soǵan qaramastan adamdar peshti durys paıdalanbaýdyń qurbanyna aınalyp jatyr. Aqtoǵaı aýdanynyń Mútkenov, Sharbaqty aýdanynyń Malınovka aýyldarynda úıden shyqqan órtten eki adam qaıtys boldy. Al Pavlodar aýdanynyń Chernoıarka, Zarıa eldi mekenderinde ıis tıgen úsh adam qaza tapty. Úılerinde pesh jaǵatyn turǵyndardyń keıbireýi qaýipsizdik talaptaryn eskermeıdi. О́kinishke qaraı, onyń sońy qaıǵyly jaǵdaılarǵa aparyp soqtyrýy múmkin, – deıdi Pavlodar oblysy tótenshe jaǵdaılar departamenti bastyǵynyń orynbasary Qaırat Shaımardenov.
Qysqy jylytý kezeńinde órt oqıǵalary jıilep ketedi. О́tken jylý maýsymynda oblysta 77 órt tirkelip, saldarynan 6 adam qaza tapqan. Taǵy 10 adam jaraqat alǵan. Turǵyn úı sektoryndaǵy órtter men ólimderdiń kópshiligi ishkilikke salynǵan nemese áleýmettik osal otbasylarynda jıi bolady.
«Tilsiz jaýdyń paıda bolý sebepteri ártúrli, eń negizgisi – salǵyrttyq. Turǵyn úı sektorynda elektr jabdyqtary men turmystyq aspaptardy montajdaý jáne paıdalanýdaǵy buzýshylyqtar, peshterdi ornatý men paıdalaný kezinde órt qaýipsizdiginiń buzylýy jıi kezdesedi. Turǵyndar túrli jylytqyshtardy paıdalanady. Keıde elektr jelilerinde qysqa tuıyqtalý oryn alyp, órt shyǵady. Oblystaǵy órtterdiń 70-80 paıyzy turǵyn úı sektorynda bolady», deıdi Q.Shaımardenov.
Jalpy, órt oqıǵalarynyń 65 paıyzy jylytý kezeńinde bolatyny baıqalǵan. Departament jergilikti polısııa qyzmetimen, atqarýshy organdarmen, volonterlik uıymdardyń ókilderimen birlesip órttiń, adamdardyń qaza bolýy men jaraqattanýynyń aldyn alý maqsatynda turaqty negizde halyqpen profılaktıkalyq is-sharalar ótkizedi. Arnaıy esepte halyqtyń áleýmettik osal tobyna jatatyn 1 233 turǵyn úı bar. Jergilikti atqarýshy organdar men úkimettik emes uıymdardyń qarajaty esebinen ýly gazdyń shyqqany týraly dabyl beretin 275 datchık ornatylǵan.
Mamandar salqyn ýaqytta pesh jaǵý kezinde qaýipsizdik sharalaryn qatań saqtaý qajet ekenin eskertedi. Jylytý peshteri aldyn ala tekserilip, órtke qarsy bólikteriniń bolýy eskerilýi kerek. Ár úsh aıda bir ret, sondaı-aq jylytý maýsymy bastalar aldynda murjalar men peshterdi kúıeden tazartyp turǵan abzal. Pesh murjalary qyzyl kirpishten qalanyp, ushqyn tutqyshtarmen jabdyqtalýǵa tıis. Shatyrdaǵy tútin arnalary ótetin barlyq qubyrlar men qabyrǵalardy ákteý kerek. Qoldanystaǵy zańnamaǵa sáıkes tótenshe jaǵdaılar qyzmetkerleri jer úıler sektoryna tekserý júrgizýge, uıǵarymdar berýge quqyly emes. Tek profılaktıkalyq jumystar ǵana júrgize alady. Sondyqtan qaýipsizdik talaptary úı ıeleriniń óz jaýapkershilikterinde qala bermek.
Pavlodar oblysy
