Eńbek jáne halyqty áleýmettik qorǵaý mınıstrliginiń málimetinshe, elimizde 732,1 myń múgedektigi bar adam turady. Onyń ishinde 381,3 myńy eńbekke qabiletti jasta. Áleýmettik kodekske sáıkes jergilikti atqarýshy organdar múgedektigi bar adamdar úshin aýyr jumystardaǵy, eńbek jaǵdaılary zııandy, qaýipti jumystardaǵy jumys oryndaryn esepke almaǵanda, jumysshylardyń jalpy sanynyń 2-4 %-na deıin (jaldamaly jumyskerlerdiń jalpy sany keminde 50 adam bolǵan kezde) kólemde jumys oryndaryna kvota bóledi. Bıylǵy toǵyz aıda bólingen kvota nátıjesinde múgedektigi bar 5,4 myń adam jumysqa ornalastyryldy.
Sondaı-aq erekshe qajettiligi bar adamdar jumyspen qamtýǵa járdemdesýdiń sharalaryna da belsendi qatysyp keledi. Bıylǵy 1 qazandaǵy kórsetkish boıynsha turaqty jumysqa 5,9 myń adam ornalassa, jastar praktıkasyna – 505, áleýmettik jumys oryndaryna – 654, qoǵamdyq jumystarǵa – 5,9 myń, «Kúmis jas» jobasymen – 828, «Alǵashqy jumys orny» jobasymen – 183 adam, «Urpaqtar kelisimsharty» jobasymen 6 adam jumyspen qamtyldy.
Múgedektigi bar azamattardyń arasynda qysqamerzimdi kásiptik oqytýǵa – 272, «Bastaý bıznes» jobasy arqyly kásipkerliktiń qyr-syryn meńgerý kýrsyna 5 myń adam jazylǵan. Halyqtyń áleýmettik osal toptaryna enetin azamattarǵa óz kásibin ashyp, sharýasyn júrgizýge 400 AEK-ke deıingi (1,4 mln teńge) mólsherinde memlekettik granttar beriledi. Búginde osy ıgilikti qoldaýdy múgedektigi bar 1 470 adam kórip, kásibin dóńgeletip otyr.
Elimizde 2018 jyldan bastap halyqaralyq tájirıbe negizinde múgedektigi bar adamdarǵa arnaıy jumys ornyn jaraqtandyrý qolǵa alyndy. Nátıjesinde, jumys berýshilerdiń shyǵyndaryn sýbsıdııalaý iske asyrylyp, bıyl osyndaı arnaıy 71 jumys orny quryldy.
