Búgingi mektep túlegi mamandyqtan buryn grant alýdy oılaıdy

Bul aqıqatqa aınalyp barady. Túsken mamandyǵyna kóńili tolmasa da, amalsyz tórt-bes jyldy ótkizip, qatyrma qaǵazdy qaltaǵa salyp, odan soń ár mekemeniń esigin qaǵyp, jumyssyz júrgen «mamandar» az emes. Álemde 80 myń mamandyq bolsa, biz sonyń 10 myńdaıyn meńgeretin sekildimiz. Qazir talapkerlerdiń 70 paıyzy ata-ananyń aıtýy­men, dostarynyń nusqaýymen, jarnamanyń «ja­rylqaýymen» mamandyq tańdaıtyn kó­rinedi. Tek 19 paıyz talapker tańdaǵan ma­man­dyǵyna tabandy eken. Stýdenttermen oı bólisseń, beseýdiń bireýi oqyp júrgen mamandyǵyna kóńili tolatynyn aıtsa, qalǵandary kezdeısoq kelgenderin jetkizedi. UBT-da tórtinshi pán degen bar. Sol boıynsha birinshi tańdaǵan mamandyǵyńa túse alasyń, qalǵany álgindeı amalsyzdyń tirligi. Máselen, medısına mamandyǵyn «súıdińiz», biraq tilek qabyl bolmady. Tórtinshi pán bıologııa, sol boıynsha aýyl sharýashylyǵyna qajet mamandy oqytatyn JOO-ǵa túsýińe múmkindik bar. Grantqa qoly jetpegender ata-anasynyń qaltasyna qaraı jekemenshik oqý oryndaryn jaǵalaıdy. Bizdegi mamandyq daıyndaý osylaısha jalǵasý ústinde. Keıde astaryna úńilmeı, daıyndalǵan maman nashar dep jatamyz. Sonda memlekettiń qarjysy, ata-ananyń aqshasy qalaısha aqtalmaıdy, onyń sebebi ne degende zerttep-zerdeleý qajet tárizdi. Biz bul oıdy nege qozǵap otyrmyz? Elbasynyń tapsyrmasyna oraı ındýstrııalyq-ınnovasııalyq damý baǵdarlamasyna qajetti 35 myńnan astam maman daıyndaý kerek eken. Bul úshin jańa baǵdarlamalar jasalyp, materıaldyq baza kúsheıtilip, professorlar áleýeti arttyrylmaq. Sonda osyǵan deıin daı­yndaǵan mamandarymyz ilikke alynbaıtyn boldy ma? Bul baǵdarlama da burynǵy baǵ­darlamalardyń súrleýimen ketip, maman daıyndaý degen maqamdy qashanǵa deıin sozamyz? Jańa qadam aldynda mektep túlekteri arasynda mamandyq tańdaý, kásipke baýlý boıynsha jumystar júrgizsek, utylmas edik. Bul jumysty qansha jerden kústánalasaq ta keńes zamanynda júıeli júrgiziletin. Sony da eskersek, esh artyqtyǵy joq sekildi. Sebebi, osy kúnderi bilim uıalarynan ómir baspaldaǵyna attaǵaly otyrǵan ul men qyzdyń oıy bolashaǵyna tııanaq, eline septigin tıgizýge qural bolar mamandyq tańdaý emes, UBT-nyń qasań suraqtaryn jattaýmen ótip jatyr. Súleımen MÁMET, «Egemen Qazaqstan».