Sýret: ru.freepik.com
Álemdik aýqymdaǵy ózekti máseleni basty taqyryp etip alǵan is-sharanyń maqsaty – BAQ ókilderiniń kıberqaýipsizdik salasyndaǵy bilimin jáne quzyrettiligin arttyrý. Uıymdastyrýshylardyń aıtýynsha, mundaı qadam sıfrlyq dáýirde otandyq medıa keńistiktiń nyǵaıýyna yqpal etpek.
Trenıng barysynda spıkerler kıberqaýipsizdik salasyndaǵy ózekti máseleler men trendterdi ashyp kórsetýge tyrysty. Sondaı-aq bul kezdesýde mınıstrlik ókilderi aqparattyq keńistiktegi qaýipsizdikti damytý strategııalary týraly oıymen bólisti.
Sıfrlyq damý, ınnovasııalar jáne aeroǵarysh ónerkásibi mınıstrligi Aqparattyq qaýipsizdik komıtetiniń tóraǵasy Rýslan Ábdiqalyqov kıberqaýipsizdikti damytý memleket qana nemese tek Aqparattyq qaýipsizdik komıteti aınalysatyn másele emes, bul tutas bir úlken sala ekenin aıtyp ótti.
– Búgin biz osy máseleniń mańyzyn arttyrý, onyń azamattarǵa uǵynyqty bolýyn túsindirý maqsatynda jınaldyq. Shyn máninde bul taqyryp aıasynda buǵan deıin az aıtylyp, kem jazylmady. Aqparattyq qaýipsizdikke qatysty keleńsizdikterdiń 90 paıyzǵa jýyǵy adamnyń ózimen baılanysty bolyp otyr. Iаǵnı qazirgi tańda aqparattyq tehnologııalarǵa jol ashqannan góri aldymen adamnyń ózin «buzý» ońaıyraq bolyp tur. Aqparattyq qurylǵylardy, baǵdarlamalardy bilimi jetik bilikti mamandar baqylap, kıbershabýyldan qorǵap otyrady. Al jeke adam bul turǵyda hakerler úshin eń álsiz obekt bolyp otyr. Sol úshin ár adam kúndelikti ómirdegi ár qadamyn tek ózi ǵana saqtandyra alady. Al ol úshin memleket retinde biz jáne aqparat jarshysy retinde jýrnalıster birlese otyryp osy nársege halyqty, qoǵamdy úıretip, daǵdylandyrýymyz kerek, – deıdi komıtet tóraǵasy.
«Medıa damytý qory» korporatıvtik qory bas dırektorynyń orynbasary Ásel Serikbaeva da taqyryp tóńireginde pikir bildirdi.
– Joǵary oqý oryndarynyń da jeke bas derekterimen jumys isteý baǵytyndaǵy is-sharalary kıberqaýipsizdik salasyndaǵy mamandardyń kıbershabýylǵa tótep bere alýyn qamtamasyz etedi. Sol sebepti kıbergıgıena mashyqtaryn meńgertý tek óz málimetterin emes, sonymen qatar aýdıtorııaǵa degen senimniń kásibı etıkasyn nyǵaıta otyryp aqparat kózin de qorǵaýǵa kómektesedi, – deıdi Á.Serikbaeva.
Sondaı-aq trenıngke negizgi spıker retinde shaqyrylǵan «MSSP Global» ókili Medet Týrın aqparattyq qaýipsizdik salasynda 12 jyldan beri izdenip kele jatqanyn jetkizdi. Spıker aqparattyq qaýipsizdiktiń negizgi mindetterine toqtaldy. Iаǵnı uıymnyń jumys ónimdiligine zııan keltirmeıtin derekterdiń qupııalylyǵyn, tutastyǵyn jáne qoljetimdiligin saqtaý máselelerin atap ótti. Sonymen qatar kıberqaýip týraly da keńirek aıtyp berdi.
– Qazaqstan jahandyq kıbershabýyl reıtınginde – jetinshi, al TMD elderi arasynda – ekinshi orynda. 2023 jyldyń qorytyndysy boıynsha, respýblıkada 223 mıllıonnan asa kıbershabýyl áreketteri tirkeldi. 2022 jyly ınternet qaskóıleri turǵyndar men memleketke 110,8 mlrd, al 2023 jyly 140 mlrd teńge zııan keltirgen. Bizde áli de qaýipsizdikpen «órt tutanyp», arty daýǵa aınalyp ketken soń ǵana aınalysa bastaıtyn ádet bar. Bul halyqtyń áli de ınternet qaýipsizdigi tóńireginde aqparattandyrylýynyń tómendigin kórsetip otyr, – dedi M.Týrın.
Is-shara barysynda «MSSP Global» men Qazaq-Amerıka ýnıversıteti arasynda osy baǵyttaǵy birlesken is-qımyldardy qamtyǵan memorandýmǵa qol qoıyldy.
