Qoǵam áıelderdiń belsendiligimen ádemi

Keshe Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraıymynyń orynbasarlary, Parlament Májilisiniń depýtaty E. Tarasenko men Ortalyq saılaý komıssııasynyń múshesi L.Súleımen Qaraǵandy, Temirtaý qalalarynda jumys saparymen boldy. Ulttyq komıssııa ókilderi oblys ákimi Nurmuhambet Ábdi­bekovpen áńgimelesýde óńirdegi áıelderdiń qoǵamdyq-saıası jumystarǵa, ekonomıka salasyna qatysýy, Memleket basshysynyń damýdy odan ári nyǵaıtý úshin belgilegen bes ınstıtýttyq reformasyn júzege asyrýdaǵy úlesi týraly máselelerdi talqylady. Aımaq basshysymen kezdesýden soń oblys ákimi janyndaǵy áıelder isteri jáne otbasylyq-demografııalyq saıasat jónindegi ko­mıssııanyń keńeıtilgen otyrysy ótti. Onda selektorlyq re­jimde qalalar men aýdandar ákimderiniń orynbasarlarymen kún tártibindegi másele boıyn­sha keleli áńgime qozǵaldy. Otyrysty ashqan Elena Tarasenko óz sózinde «Elbasynyń «Nurly Jol – bolashaqqa bas­tar jol» Joldaýynda alǵa qoıylǵan basym baǵyttardy, sondaı-aq, bes ınstıtýttyq reforma mindetterin oryndaýǵa qazaqstandyq áıelder de belsene atsalysýda dep nyq senimmen aıta alamyz. Bizdiń negizgi jumysymyz osy baǵyttaǵy óńirlik deıgeıdegi is-sharalardy kúsheıtýge arnalady. Bular olardyń jumysqa ornalasýyn qamtamasyz etý, kásipkerligin qoldaý, bıznestiń jaýapkershiligin arttyrý, jańa ekonomıkalyq saıa­sat aıasynda ınfraqurylymdyq jo­balarǵa keńinen qamtý bolyp tabylady», dedi. Al Lázzat Súleımen áıeldermen naq­ty jumys isteýdi kúsheıtý, olar­dyń múdde-tilekterin bilý, oǵan bıliktiń nazaryn aýdarý, turmysy qolaısyz toppen tikeleı baılanys jasaý, qoǵamda oryn alatyn teris faktorlardyń  (balalarǵa zorlyq-zombylyq jáne qatygezdik kórsetý, ózine ózi qol jumsaý, nekege erte otyrý, jasóspirimdik júktilik, t.b) aldyn alý úshin jumys pármendiligi men tıimdiligin jaqsartý kerektigin aıtty. Otyrysta oblystyq densaýlyq saqtaý, bilim basqarmalarynyń esepteri tyńdaldy. Jumys sapary barysynda Qaraǵandy jáne Temirtaý qalalaryndaǵy «Qaraǵandy úı kombınaty» JShS-inde «Shapaǵat» balalar úıinde, ómirde qıyn jaǵdaıǵa tap bolýshy áıelderge arnalǵan «Moı dolg» daǵdarys ortalyǵynda kezdesýler ótti. Aıqyn NESIPBAI, «Egemen Qazaqstan». Qaraǵandy oblysy.