Álııa

Aqtóbe topyraǵynda halqy­nyń aıaýly qarylǵashy, Shyǵys­tyń qos shynarynyń biri, qan maıdanda erlermen birge erliktiń asqan úlgisin kórsetken Keńes Odaǵy­nyń Batyry Álııa Moldaǵulovanyń 90 jyldyq mereıtoıy bastalyp ta ketti. Aldymen oblys orta­lyǵyndaǵy batyr qyzdyń memo­rıaldyq keshenine soǵys jáne eńbek ardagerleri, Álııanyń týystary, «Álııa gúli» dostaryn shaqyrady» VI halyqaralyq balalar shyǵarmashylyǵy festıvaline qatysýshylar jáne aqtóbelikter gúl shoqtaryn qoıdy. Saltanatty sharada sóz alǵan qala ákiminiń orynbasary A.Aryn­ǵazıeva jınalǵandardy mereıtoımen quttyqtap, «Biz Álııa erligine bas ıemiz» dedi. Álııanyń naǵashy inisi Sapar Moldaǵulov batyr qyzyna qur­met kórsetip jatqan halyqqa rıza­shylyǵyn bildirdi. Munyń ózi Álııa apaıynyń rýhynyń aldyndaǵy urpaq paryzy ekenin tilge tıek etti. Saltanatty sátti ««Álııa gúli» dos­taryn shaqyrady» VI halyqaralyq balalar shyǵar­mashylyǵy festıvaline qaty­sýshylar myń buralǵan bımen bederledi. Odan keıin mereıtoı qonaǵy áskerı ǵylymdar doktory Kım Serikbev Álııanyń erligi arqyly tek aqtóbelikter ǵana emes, barsha qazaqstandyqtar maq­tanatynyn  jetkizip Álııa men Mánshúktiń ómiri men erligi týraly oı tolǵady. «Qos Shynar» qoǵamdyq birlestigi Aqtóbe qalalyq qaıyrymdylyq qorynyń tóraǵasy Ǵalymjan Baıderbes Álııa apamyz jaıly mazmundy sóz aıtty. Aqyn Amantaı О́tegenov Álııa týraly jyrdan shashý shashty. Shara barysynda «Álııa gúli» halyqtyq bı ansambli, oblystyq fılarmonııa ártisteri óz ónerlerin kórsetip, Marat Ospanov atyn­daǵy Batys Qazaqstan memlekettik medısına ýnıversıtetiniń dosenti, áýesqoı sýretshi A.Korvattyń sýret kórmesi uıymdastyryldy. Satybaldy SÁÝIRBAI, «Egemen Qazaqstan». Aqtóbe oblysy.