Sýret: gov.kz
Búginde jetisýlyq máslıhat depýtattary ekinshi jyl óńirimizdiń órkendep-ósýi úshin irgeli ister atqaryp keledi. Máselen, byltyr 4 kezekti jáne 8 kezekten tys sessııa ótip, 100-ge jýyq ádilet organdarynda tirkeýge jatatyn sheshim qabyldaǵan. Byltyr oblys bıýdjeti 488,9 mlrd teńgeni qurady. Osy qarjynyń deni aýyl sharýashylyǵy salasyna bólinedi. Bolashaǵy joq dep sanalǵan eldi mekenderdiń tamyryna qan júgirip, sport, medısına nysandary boı kóterdi. Aýyldarǵa jańa bilim mekemeleri salynyp jatyr. Muny bizge oblystyq máslıhat tóraǵasy Gúlnar Toılybaeva aıtyp berdi.
«Aýyl – el ekonomıkasynyń negizgi lokomatıvi. Qazir Jetisý aýyldary qaıta túlep keledi. Alǵash oblys ákimi Beıbit О́ksikbaıulymen birlese aýdan turǵyndarymen kezdesýge barǵanda halyq sý, jer, gaz, jol máselesin jıi aıtatyn. Qazir azaıyp keledi, qarııalar alǵysyn jaýdyrady. Oblys depýtattary kótergen saýaldardyń deni óz sheshimin tapty. Mysaly, Qońyr aýylyndaǵy orta mekteptiń mańaıyndaǵy eski elektr baǵanalary adam ómirine qaýip tóndirip, jańa mekteptiń syrtqy kelbetine saı kelmeıtin. Sol úshin «TATEK» AQ-nyń basqarma tóraǵasy men Qarabulaq elektr jelilerine depýtattyq saýal joldadym. Bul másele bir aıǵa jetpeı óz sheshimin tapty», deıdi G.Toılybaeva.
Joǵaryda aıtqan máselege uqsas oblystyq máslıhat depýtaty Konstantın Nesterov te Tekeli qalasy Rýdnıchnyı aýylyndaǵy tozyǵy jetken elektr baǵanalaryn aýystyrý jaıynda depýtattyq saýal joldaǵan eken. Bul másele de óz sheshimin tapqan. Rýdnıchnyı aýylynyń 400 metr oqshaýlanǵan elektr symdary men 33 dana baǵana aýystyrylyp, 11 dana transformatorlyq qosalqy stansalaryna jóndeý jumysy júrgizilgen. Buǵan qosa aýyl ishindegi eskirgen kópirdi qaıta salý, úıilgen qoqystardy tazalaý jumysyna da halyq qalaýlylary muryndyq bolǵan.
Osy rette bir oqıǵa eske túsedi. Bul – Qoılyq aýyldyq okrýgindegi terapevt dárigerdiń joqtyǵy. 2 800 turǵyny bar aýyldyń jaıy kópten beri aıtylyp júrgen másele edi. Jaqynda aýylǵa barsaq, ár beısenbide aýyl ambýlatorııasyna aýdan ortalyǵynan bilikti dáriger kelip, turǵyndardy qabyldaıdy eken. Kezek kútip, jolǵa kólik izdep qajyǵan halyq oblystyq máslıhatqa rızashylyǵyn bildirip otyr.
«Balamyz aýyrsa, aýdanǵa shapqylaımyz. Onda kezek kútesiń, onyń ústine qaltamyzda únemi aqsha bolýy kerek. Qazir jaqsy boldy. Aptasyna bir ret dáriger kelip tolyq tekserip ketedi. Mal sharýasynda júrgennen keıin densaýlyqqa qaraıtyn ýaqyt ta bolmaıdy. Endi gaz kútip otyrǵan halyq kóp. Odan bólek, aýyl sharýalary jaıylymdyq, egindik jer alýda biraz kedergilerge tap bolady. Osyny halyq qalaýlylary eskerse degen oıymdy aıtqym keledi», deıdi aýyl turǵyny Aıkúmis Aqshabaı.
Qazir halyqty aýylda saqtap qalýǵa memleket tarapynan túrli joba qolǵa alynyp jatyr. Ásirese jastarǵa aýyldan tegin turǵyn úı berip, arnaıy kóterme qarjy da úlestiredi. Kópke aıan «Aýyl amanaty» baǵdarlamasy kóptegen turǵynnyń jeke sharýasyn damytýǵa úlken sep boldy.
«Aýyldy óristetý úshin túrli joba júzege asyp jatyr. Biz barynsha halyqtyń suranysyn qanaǵattandyrýǵa tyrysamyz. Bıyl depýtattar 100-den asa turǵyndy qabyldap, 90 paıyzynyń máselesin sheshýge járdemdesken. Máselen, turǵyndar «Samal» shaǵyn aýdanynda kópqabatty úılerdiń ortasynda ornalasqan trotýar boıyna jaryq shamdaryn ornatýdy suraǵan. Osy rette oblystyq máslıhat depýtaty Qaırat Nurǵabyluly nebári bir aptanyń ishinde óz qarajaty esebinen jaryq baǵanalaryn ornatyp, halyq alǵysyna bólendi. Sondaı-aq depýtat Jalǵas Altynbekov «Jarkent alǵyr» qurylys kompanııasynyń dırektory retinde óz qarajatynan uzyndyǵy 1 shaqyrym A.Túrkebaev kóshesine baǵanaly jaryq shamdaryn ornatyp berdi. Bul da bolsa – halyqqa úlken kómek», deıdi G.Toılybaeva.
El tilegine qulaq túrip, amanatyn arqalaǵan depýtattarymyzdyń nátıjeli jumysy az emes. Aldaǵy ýaqytta kópshilikti tolǵandyryp júrgen məseleler boıynsha áli talaı jumys atqarylady.
Jetisý oblysy
