Nazarbaevy bar Qazaqstan – senimmen turaqty damıtyn el!
Nazarbaevy bar qoǵam – alańsyz ómir súretin qoǵam!
(О́zimdegi osy bir senimmen daýys berdim)
Astana qalasynyń Esil aýdanyndaǵy №91 saılaý ýchaskesine baryp daýys berdim. Kezekte turýǵa týra keldi. Biraq, saılaý ýchaskesindegi bul jolǵy kezektiń jóni múldem basqa bolatyn. Sol kezekte turǵandardyń báriniń de kóńilderi jarqyn, qabaqtary ashyq edi, kóńilderinde qýanysh turdy. Men óz basym, otbasymmen Qazaqstannyń qazirgi Prezıdenti Nursultan Ábishuly Nazarbaev úshin daýys berdim! Otandastarymnyń basym kópshiliginiń de Nazarbaev úshin daýys beretindikterine senimdi edim. Buǵan kóńilimde esh kúmán da bolǵan joq. О́ıtkeni, táýelsiz qazaq eliniń tarıhy sol eldiń eki tizgin, bir shylbyryn óz qolyna ustaǵan Nursultan Nazarbaevtyń taǵdyry, buǵan kerisinshe Elbasynyń taǵdyry Qazaq eliniń taǵdyry men tarıhy bolyp qalyptasty. Bul qos taǵdyr – tutas bir halyqtyń taǵdyry! Mine, sol qos taǵdyr taǵy da tarıh aldyndaǵy uly jaýapkershilik júgin birge kóterý úshin taǵy da adal kóńil, adal nıetpen tabysyp otyr. Qazaqstandyqtardyń saılaý ýchaskelerine asyqqandary da, uzyn-sonar kezekte turyp, daýys bergendikteriniń de tereń máni osy bolatyn.
Áńgimeniń birden adalyn aıtaıyq, bul jolǵy saılaýda da Nursultan Ábishuly Nazarbaevtyń jeńiske jetetindigine eshkimniń de kúdigi de, kúmáni de bolǵan joq. О́ıtkeni, barlyq qazaqstandyqtar el táýelsizdiginiń alǵashqy kúninen bastap, Elbasynyń óz senimderin aqtap kele jatqandyǵyn ǵana biledi. Keshegi keńestik ókimet qulap, sharýasynyń berekesi ábden qashqan, tipti, halqynyń tıesili jalaqysy men zeınetaqysyn, túrli tólemaqylaryn bereıin dese qazynasynda kók tıyny da qalmaǵan, «bular endi el bola almaıdy» degen kúdikti oılarymen atajurttaryna qotaryla kóship, el sheti sógilip, júgi jurtta shashylyp qalǵandaı bolǵan Qazaqstanǵa, bylaısha aıtqanda, ıesiz qalǵan óz eli men óz jerine qorǵan bolǵan, sóıtip, táýelsizdiktiń alǵashqy bir onjyldyǵynda Qazaq elin álemniń damyǵan aldyńǵy qatarly memleketteriniń legine ilestirgen Nursultan Nazarbaev syndy dara da dana ulanyna barlyq qazaqstandyqtardyń bir kisideı daýys beretindikterin eshkimniń úgitinsiz-aq, eshqandaı nasıhatsyz-aq qalyń el saılaý bolar kúnge deıin aıtyp ta júrgen bolatyn. Muny el ishinde júrgenimizde estip te júrdik.
Bul saılaýda Elbasyna degen eldiń senimi jeńdi! Áńgimemizdiń osy bir parasyn tarata aıtar bolsaq, Nursultan Ábishuly Nazarbaev óziniń osyǵan deıingi el bıliginde júrip, sol eldiń senimin aqtap qana qoıǵan joq, tipti, eshkimniń oıyna da kirip-shyqpas ıgi de jaqsy ister atqara bildi. Táýelsizdigimiz áli de táltirektep turǵan sonaý toqsanynshy jyldary Almatyda jatqan astanany burynǵy Aqmola, Selınogradqa kóshirtip, búgingi Astana qalasyn salady dep kim oılaǵan?! HH ǵasyrda óz eliniń astanasyn basqa orynǵa kóshirtip, jańadan salǵan Qazaqstan álemdegi birden-bir jalǵyz el bolsa, sondaı batyl qadamǵa, batyl sheshim qabyldaýǵa barǵan da jalǵyz Nazarbaev bolatyn! Búgingi Astana eldiń Nursultan Nazarbaevqa degen berik seniminiń bir sımvoly!
Táýelsizdiktiń shırek ǵasyrǵa jaqyndap qalǵan qıly-qıly joldary men ǵasyrǵa tatyrlyq jyldary Nazarbaevy bar Qazaqstan senimmen turaqty damıtyn el, Nazarbaevy bar qoǵam alańsyz ómir súretin qoǵam ekendigine barlyq qazaqstandyqtar men álem jurtshylyǵynyń kózin jetkizgendigi de jáne de soǵan eshbir shúbásiz senim qalyptastyrǵany bar!
Bul saılaýda táýelsizdiktiń alǵashqy sátinen bastap «meniń bar tilegim de, zar tilegim de eldiń birligi» dep Elbasynyń ózi uıystyra bilgen eldiń birligi jeńdi, eldiń yntymaǵy ozdy! Álem tarıhynyń kúni keshe bastaldy deıtin XXI ǵasyrynyń búgingi on eki jylynyń ǵana sııasy keýip úlgermeı jatqan betterine úńiler bolsaq, nebir soıqandy da alasapyrandy oqıǵalar men qan tógister ár el men ár halyqtyń óz birlikteri men berekelerin, yntymaǵy men tynyshtyǵyn saqtap tura alatyn da, saqtap qala alatyn da sol eldiń birligi men halyqtyń yntymaǵynan ózge eshbir qýatty qarý joq ekendigine ılandyra túsedi. Bizge, barlyq qazaqstandyqtarǵa osy bir uly aqıqatty uǵyndyrǵan da, áli de kún qurǵatpaı aıtyp, uǵyndyryp kele jatqan da Prezıdent Nazarbaev! Qazaqstandyqtar taǵy da sol ózderiniń birlik pen yntymaq jónindegi Elbasynyń kıeli uǵymyn tereń uǵyna bilgen qasıetterimen álem aldynda taǵy da óz abyroılaryn asqaqtatyp, jarqyn júzderimen tarıhı jańa bir bıik beleske kóterildi!
Bul saılaýda Elbasynyń Qazaq elin «Nurly Jol» baǵdarlamasymen damytyp, Qazaqstandy álemniń damyǵan otyz memleketiniń qataryna qosý jolynda bastalyp ketken ulan-ǵaıyr isterdi barlyq qazaqstandyqtardyń Nazarbaevpen birge atqarsaq, Elbasynyń tarıhı mańyzy asa zor «Barshaǵa birdeı osy zamanǵy memleket: bes ınstıtýttyq reforma» atty saılaýaldy baǵdarlamasyn birge júzege asyrsaq jáne de Máńgilik el bolsaq degen ańsarly maqsattary jeńiske ıe boldy! Alda álem nazarynyń ushyna baılanǵan EKSPO-2017 kórmesin ótkizý mindeti tur. Alda «barlyq syrttan soqqan daýyldar men qıyndyqtarǵa qaramaı, Qazaqstan tek alǵa júrýge tıis!» degen Nursultan Nazarbaevtyń sol saılaýaldy baǵdarlamasynda atap kórsetip otyrǵan osy qaǵıdamen qazaqstandyq uly joldy dáýirdiń syn qaterlerine tótep bere otyryp, odan ári jalǵastyrý jáne nyǵaıtýdyń qıyn da kúrdeli mindetteri tur. Bulardy da Elbasy naqtyly anyqtap, aıqyndap ta berdi. Bes ınstıtýttyq reforma arqaýynyń bes tuǵyry bar. Olar: barshaǵa birdeı osy zamanǵy memleket, zańnyń ústemdigi, ornyqty ekonomıka, bolashaǵy birtutas ult jáne ashyq jáne halyqqa esep berýshi memleket! Bári de mańyzdy! Bul bizdiń Máńgilik el bolýymyzdyń kepili jáne alǵysharttarynyń biri!
Bul saılaýda Elbasynyń Saılaýaldy baǵdarlamasy barlyq qazaqstandyqtardyń zor qoldaýyna ıe boldy! Jeńisti de Nazarbaevtyń osy Saılaýaldy baǵdarlamasy áperdi! Jáne de bir atap kórseterlik jaı sol, Nursultan Ábishuly Nazarbaev óz baǵdarlamasynda adamzat balasynyń aldynda turǵan túrli jahandyq syn-qaterler men táýekelderdiń tereńdigi sondaı, ol kez kelgen memlekettiń turaqtylyǵy men tabystylyǵyna týra áser etip otyrmaqshy degen oıyn ashyq aıta bildi. Bizdiń elimizde sol turaqtylyq pen tabystylyq bolýy úshin Elbasy Qazaqstannyń aldyna jahandyq daǵdarystyń memleket qurylysyna yqpalynyń teris áserine jol bermeý, damýdyń qol jetkizilgen qarqynyn saqtaý, jańa serpilis úshin jaǵdaılar daıyndaý, álemniń damyǵan 30 memleketiniń qataryna qaraı ilgeri jyljýdy odan ári jalǵastyrý mindetterin qoıa otyryp, qazirgi jahandyq syn-qaterlerge jaýap berýge daıyn turý mindetterin alǵa tartty. Sóıtip, Elbasynyń osy bes ınstıtýttyq reformany memleketimizdi odan ári nyǵaıtýdyń jáne «Nurly Jol» Jańa Ekonomıkalyq Saıasatynyń barlyq mindetterin sheshý men «Qazaqstan-2050» Strategııasynyń basty maqsatyna qol jetkizýdiń negizgi tujyrymdamasy etip belgilep, el aldyna qoıǵan osy bir zamanaýı ári tarıhı mindetterin barlyq qazaqstandyqtardyń árqaısysy el aldynda, memleket aldynda atqarýǵa tıisti óz mindetterindeı sezine aldy. Nursultan Nazarbaevtyń saılaýdaǵy talassyz jeńisiniń bir tetigi de, bir syry da osynda jatqandyǵyn aıtqan lázim!
Búgingi saılaýdan keıingi kóńil tolǵanysymen Elbasynyń 2012 jyldyń 10 tamyzynda óz sapary kezinde Kókshetaýdyń bas alańyna qoıylǵan han Abylaıdyń eskertkishiniń qola músindi aıbarly júzine qarap turyp: «Men Abylaıdyń armanyn oryndadym! Abylaıhan qala sala almadym dep edi, qala saldym, halqymnyń basyn qosa almadym dep armanda ketse, men qala da saldym, halqymnyń basyn qurap egemen el de ettim!», – degen júrek sózin aıtqan sáti taǵy da esime túskeni bar. Nursultan Nazarbaevtyń bul aıtqanynda áldeqashan moıyndalǵan aqıqat jatyr.
«Men Abylaıdyń armanyn oryndadym!». Iá, mártebeli Elbasy, Siz Abylaıdyń da, Abylaıhanǵa deıin de, odan keıin de ótken ata-babalarymyzdyń bar úmiti men zar úmitin de, ańsarly bar armany men múddeli bar maqsattaryn da oryndadyńyz! Buǵan talas ta joq! Buǵan kúdik pen kúmán de joq!» degen adal oıymyzdy sol kezde aıtqan da bolatynbyz. Iá, biz óziniń el úshin jarǵaq qulaǵy jastyqqa tımeı adal eńbek etken er ulanyn han kóterip áspettegen el edik! Bul joly da solaı ettik! Bári de qutty bolsyn, týǵan el!
Jabal ERǴALIEV,
jazýshy, Qazaqstannyń eńbek sińirgen qaıratkeri, Parlament
Senatynyń depýtaty.
ASTANA.
