О́.Orymbaev 1942 jyly 5 tamyzda óz erkimen soǵysqa attanyp, Iаssko-Kıshınev operasııasyna, Kýrsk jáne Stalıngrad shaıqasyna qatysyp, Ýkraına, Majarstan, Rýmynııa men Aýstrııany fashıstik basqynshylardan bosatady.
Elge aman-esen oralǵan soń eńbek jolyn 1948 jyly aqpanda Aqmola qalasyndaǵy baılanys LTÝ quıý baqylaýshysy bolyp bastaıdy. Osy aralyqta bir jyl boıy qosymsha býhgalterlik kýrsty oqıdy. Ár jyldary nusqaýshy, jınaq kassasy basqarmasynyń aǵa tekserýshisi, oblystyq atqarý komıtetiniń aǵa referenti, tekserý bóliminiń bastyǵy qyzmetterin atqardy. 1975-1991 jyldar aralyǵynda Saran qalasynda bank salasynda eńbek etti. Zeınet jasyna deıingi on jylynda qalalyq bank bólimshesiniń basshysy bolyp, qala ekonomıkasynyń, qarjy naryǵynyń oń damýyna eseli eńbegin, eleýli úlesin qosty.
«Kópshilik úshin qıyn mamandyq sanalatyn qarjygerdiń eń negizgi mindetiniń biri – memlekettiń aqshasyn der kezinde jınap, tıimdi paıdalanyp, el ekonomıkasynyń damýyna jumys jasaý. Qarjy salasynyń qanshalyqty mańyzdy ekenin osydan-aq túsinýge bolady. Qarjy naryǵy bir orynda turmaıdy. Quldyraıtyn da, qaıta órleıtin de kezi bolady», deıdi.
Alty balasynan 16 nemere, 6 shóbere tarap otyr. Qara dombyrasy janyna áli kúnge deıin serik. Án salyp, kúı tartyp, aragidik qylqalammen sýret salatyny da bar.
Qasymhan ǴALYM,
«Egemen Qazaqstan»
Qaraǵandy oblysy
* * *
Biraz jyl Ulttyq bank júıesinde qyzmet atqarǵan. Búginde jasy júzge jetken keıýana – nemere-shóbereleriniń ortasynda shalqyp otyrǵan qadiri asqan aq áje.
Bıbiámına Sadyqqyzy 1948 jyly Ulttyq bankke qyzmetke qabyldanǵan. Sodan 1985 jylǵa deıin 37 jyl boıy mańyzdy qurylymda taban aýdarmaı eńbek etti. Jan jary Zaıdolla Valııýlınovıch Úrjar aýdanynyń prokýrory bolyp, abyroıly qyzmet qyldy. Biri quqyq, biri qarjy salasynyń ystyǵy men sýyǵyna tóze júrip jeti balany ósirip, jetkizdi.
Bala jasynan kórgeni, kóńilge túıgeni eńbek bolǵandyqtan olar da talpynys pen tabandylyqtyń arqasynda kópshilikke qadirli boldy. Ul-qyzdary Rınat, Marat, Sultan, Talǵat, Maıgúl, Madına, Rıshat túrli salanyń mamany atanyp, ómirden laıyqty ornyn tapty.
Ulttyq banktiń esepshisi bolǵan jannyń ómirden túıgeni de, urpaǵyna ósıet eter sózi de kóp.
«О́z mamandyǵyma saı qyzmet etip ári úı sharýasyna da kóńil bólip, balalardy baǵý men otaǵasynyń babyn keltirýge ýaqyt taptym. Qıyndyqtyń ózin eńbekke jeńdirip, eshteńeni elemeýge tyrystyq. Adam úlken tabysqa kenelýi úshin mamandyǵyn súıý jetkiliksiz, sonymen qatar otbasynyń da qoldaýy qajet. Osy turǵydan alǵanda men ózimdi baqytty jar ári anamyn dep oılaımyn», deıdi bank salasynyń ardageri.
Júzdiń bıigine jetip, jeti balasynan taraǵan tuqym-juraǵatynyń qýanyshyn qyzyqtaǵan ana bul kúnderi ǵasyr kýágeri atanyp otyr.
Qýat Qıyqbaı,
«Egemen Qazaqstan»
Abaı oblysy
* * *
Kúlásh Jaqypqyzy – bank júıesinde 39 jyl boıy qyzmet etip, eńbek jolynda adaldyq pen kásibılikti serik etken jan. Keıýana tyń, sergek. Radıo tyńdap, balalaryna gazet oqytyp, qoǵam tynys-tirshiliginiń ortasynan tabylýǵa tyrysady. Qazir 3 jıen, 10 jıenshar kórip otyr.
Kúlásh apa 1924 jyly 12 jeltoqsanda burynǵy Abyraly aýdany Qaınar aýylynda dúnıege kelgen.
– Men 1942 jyldyń 1 maýsymynda Qaınar orta mektebiniń 9-synybyn bitirdim. Ol kezde soǵys júrip jatqan edi. Ákem qolymnan jetelep Qaınar aýylyndaǵy memlekettik bank bólimshesine jumysqa ornalastyrdy. 9-synypty bitirgennen keıin Abyraly aýdanynda esepshi bolyp, keıin bas esepshiniń orynbasary, bas esepshi boldym. Odan keıin bir-eki jyl úzilis jasap, 1947 jyldyń sáýir aıynda Abaı aýdanyna kóship keldim. Bankke bas esepshiniń orynbasary bolyp jumysqa kirip, 1949 jyldyń qarashasynan 1950 jyldyń jeltoqsanyna deıin bas esepshi qyzmetin atqardym. 1950 jyldyń qazan aıynan 1981 jyldyń 15 maýsymyna deıin Abaı aýdanynyń Qaraýyl aýylyndaǵy bank bólimshesinde basqarýshy qyzmetin atqardym, – deıdi ájemiz.
Kúlásh apa ónimdi eńbek etý, adal bolý ári ómirdiń ár kúnin jaqsylyqqa toltyrý degen ustanymmen ǵumyr keshken.
– Teńge – egemendik belgisi, ekonomıkalyq derbestigimizdiń aıǵaǵy. О́mirimniń kóptegen jylyn qarjy salasyna arnap, teńgeniń árbir kezeńine kýá boldym. Teńge – tek aqsha quraly emes, ol bizdiń elimizdiń ósip-órkendeýine jasalǵan qadamymyzdyń, armanymyzdyń rámizi, – deıdi Kúlásh Jaqypqyzy.
Eligimaı TО́ŃKER,
«Egemen Qazaqstan»
