Foto: Ashyq derekkóz
Qylmystyq ister jónindegi aýdanaralyq soty para alý isi boıynsha tórt aıyptalýshyǵa qatysty qylmystyq isti qarady.
Habarlanǵandaı, sottalýshylar T. jáne T. QK-niń 366-babynyń 3-bóliginiń 2) tarmaǵymen (adamdar tobynyń aldyn ala sóz baılasýymen memlekettik fýnksııalardy oryndaýǵa ýákilettik berilgen adam bola tura aıtarlyqtaı mólsherde para alý) aıyptalǵan.
Al sottalýshy M. QK-niń 368-babynyń 2-bóligimen (paraqorlyqqa birneshe ret deldal bolý, ıaǵnı para berýshige jáne para alýshyǵa olardyń arasyndaǵy para alý jáne berý týraly kelisimge qol jetkizýge jáne ony iske asyrýǵa yqpal etý) aıyptalǵan. Sottalýshy A. QK-niń 367-babynyń 2-bóligimen (memlekettik fýnksııalardy oryndaýǵa ýákilettik berilgen adam bola tura aıtarlyqtaı mólsherderde para berý) aıyptalǵan.
«T. «Shymkent qalasynyń sanıtarııalyq-epıdemıologııalyq baqylaý departamenti» RMM-niń basshysy jáne T. personaldy basqarý qyzmetiniń basshysy bola tura, adamdar toby bolyp aldyn ala sóz baılasý arqyly A.-nyń qyzyn jumysqa ornalastyryp berý úshin 600 000 teńge kóleminde aıtarlyqtaı mólsherde para alǵan. M. «Shymkent bólimshelik kóliktegi sanıtarlyq-epıdemıologııalyq baqylaý basqarmasynyń» basshysy bola tura, T. men T.-ǵa 600 000 teńgeni berýde paraqorlyqqa deldal bolǵan. Sonymen qatar A., laýazymdy adamǵa deldal arqyly aıtarlyqtaı mólsherde para bergen. Sottalýshylardyń kinási ózderiniń jaýaptarymen, zattaı dáleldemelermen jáne basqa da is boıynsha jınaqtalǵan dáleldemelerdiń jıyntyǵymen tolyq dáleldenedi», delingen habarlamada.
Prokýror sottalýshylarǵa bas bostandyǵynan aıyrý jazasyn taǵaıyndaýdy suraǵan. Sottalýshylar kinálaryn moıyndap, istegen is-áreketterine shynaıy ókinish bildirip, bas bostandyǵynan aıyrmaıtyn jaza taǵaıyndaýdy ótingen.
«Sot sottalýshylardyń qylmystyq jaýapkershilikti jeńildetetin mán-jaılar retinde istegen is-áreketterine shynaıy ókinish bildirgenin, jaýapkershilikti aýyrlatatyn mán-jaılar anyqtalmaǵanyn eskerdi. Sot T.-ny QK-niń 366-babynyń 3-bóliginiń 2) tarmaǵymen kináli dep tanyp, 6 jylǵa bas bostandyǵynan aıyrý jazasyn taǵaıyndady. T.-ny QK-niń 366-babynyń 3-bóliginiń 2) tarmaǵymen kináli dep tanyp, 21 000 000 teńge mólsherinde aıyppul jazasyn taǵaıyndady. M.-ny QK-niń 368-babynyń 2-bóligimen kináli dep tanyp, 9 000 000 teńge mólsherinde aıyppul jazasyn taǵaıyndady. A.-ny QK-niń 367-babynyń 2-bóligimen kináli dep tanyp, 12 000 000 teńge mólsherinde aıyppul jazasyn taǵaıyndady», delingen habarlamada.
Sot úkimi zańdy kúshine engen joq.
