Ardager murasynyń tusaýkeseri

Jaqynda Astanadaǵy Q.Qýanyshbaev atyndaǵy Qazaq drama teatryn­da Qorǵaljyn óńiriniń ardaqty azamaty, keńes-partııa qyzmetiniń ardageri, artynda shyǵarmashylyq mol mura qaldyrǵan Ermek Bijkenovti eske alý jáne onyń «Arman asýynda», «Jan tynysy» atty kitaptarynyń tusaýkeseri bolyp ótti. Keshti L.N.Gýmılev atyndaǵy Eýrazııa ulttyq ýnıversıtetiniń prorektory, fılologııa ǵylymdarynyń doktory, professor Dıqan Qam­zabekuly moderator retinde júr­gizip otyrdy. «Qazaq dalasy sóz qadirin biletin azamattardan kende bolǵan emes. Tipti, tańdaǵan mamandyǵy til-ádebıetten bólek azamattar da kórkemsóz ónerine hal-qaderinshe atsalysty. Keńes-partııa qyzmetinde bolǵan talaı qaıratkerlerdiń halqymyzdyń rýhanı murasyn tolyqtyrǵany da oqyrman qaýymǵa belgili. Osy oraıda, Aqmola jáne Qorǵaljyn óńirine belgili azamat, osy aımaq­taǵy talaı sharýashylyqty uıym­dastyryp, bilim jáne aǵartý salasyn damytqan qaıratker, hal-qaderinshe ádebıet pen ónerge atsalysqan qalamger hám aýdarmashy Ermek Baltabaıuly Bijkenovtiń týǵanyna 80 jyl tolǵan jáne onyń qalamynan shyqqan týyndylarynyń oqyrman qaýymǵa jol tartqan tusaýkeser keshine jınalyp otyrmyz», dedi ol óziniń kirispe sózinde. «Ál-Farabı atyndaǵy Qazaq ulttyq ýnıversıtetiniń qara sha­ńyraǵynda bilim nárimen sý­syndaǵan Ermek Baltabaıuly qalada qalyp, qalamgerlerdiń dúbirli tobynyń bel ortasynda júrmese de el arasynda tu­ryp shyǵarmashylyqpen aınalysty. Artynda qalǵan «Kúıeý balaǵa qurylǵan tor», «О́mir ótkelinde», «Arman asýynda» atty týyndylarymen V.Drozdan aýda­rǵan «Slastıonnyń bas kıimi» povesi kásibı jazýshy emes, áde­bıettiń kıesin túsingen azamat­tyń qalamynan týǵan qundy dú­nıeler», dedi tusaýkeser keshinde Ermek Bijkenovtiń ómiri men shy­ǵarmashylyq eńbegi haqynda baıandama jasaǵan Eýrazııa ulttyq ýnıversıtetiniń professory, fılologııa ǵylymdarynyń doktory Serik Negımov. Iá, bilikti de bilimdi Ermek Bijkenov óziniń búkil sanaly ǵumyryn Qorǵaljyn óńiriniń ekonomıkalyq-áleýmettik jaǵ­daıyn jaqsartýǵa, oqý-aǵartý salasyn damytýǵa arnady. Ol 1956 jyly QazMÝ-dy úzdik bitirip, arnaıy joldamamen Qorǵaljyn aýdandyq oqý bóliminde mektep ıns­pektory bolyp eńbek jolyn bastaıdy. Mine, osydan bastap ómiriniń sońyna deıin osy óńirde tapjylmaı eńbek etip, Qorǵaljyn aýdandyq partııa komıtetiniń ıdeologııa jónindegi hatshysy laýazymyna deıingi ósý jolynan ótedi. О́kinishke qaraı, Ermek Baltabaıulynyń ómiri aqqan juldyzdaı qysqa boldy. Alaıda, ol osy jarty ǵasyr qysqa ǵumyrynda adal eńbegimen týǵan eliniń úlken qurmetine bólenip, artynda óshpes iz qaldyrdy. Tusaýkeser rásiminde Ermek Bij­kenovtiń ýnıversıtette bir kýrs­ta oqyǵan dosy, Qazaqstannyń eń­bek sińirgen qaıratkeri, aqyn Nurǵoja Oraz, Qorǵaljyn óńiriniń ardagerleri, aýyl sharýashylyǵy ǵylymdarynyń kandıdaty, zeınetker Bostan Shahmanov, tehnıka ǵylymdarynyń kandıdaty,  zeınetker Jańbyrshy Núrkenov, Qorǵaljyn aýdany ákiminiń orynbasary Saǵdat Aqqojına, Qorǵaljyn aýdany №1 mektep-lıseıiniń dırektory Nurlan Tájın jáne osy joldardyń avtory sóz sóılep, Ermek Bal­tabaıulynyń ómiri men eńbek jolyna qatysty estelikterin ortaǵa saldy. Keshti Q.Qýanyshbaev atyn­daǵy Qazaq drama teatrynyń ártisteri qalamger týyndylary negizinde jasalǵan sahnalyq qoıy­lymdarmen órnektep otyrdy. Jylqybaı JAǴYPARULY, «Egemen Qazaqstan».