Tótenshe jaǵdaı Sabyndy aýylyndaǵy burynǵy aýyldyq meshit ǵımaratynda jerleý rásimi ótetin jerde boldy.
Oblystyq tótenshe jaǵdaılar qyzmetiniń habarlaýynsha, gaz-aýa qospasy jarylyp, keıin opyrylǵan. Oqıǵa ornyna dereý jetken qutqarýshylar alty gaz ballonyn shyǵardy. Jalpy ǵımaratta jeti gaz ballony bolǵan.
Oqıǵa saldarynan 1978 jyly týǵan er adam qaıtys boldy. Úıindi astynan qutqarýshylar 1983 jyly týǵan áıel men 2012 jyly týǵan balanyń denesin tapty.
Jedel járdem brıgadasy zardap shekken 16 adamdy Astana qalalyq aýrýhanasyna jetkizdi.
- Qazir qutqarýshylar úıindilerdi tazartyp jatyr. Oblystyq tótenshe jaǵdaılar departamentinen jeke quramnyń 30-ǵa jýyq adamy men 5 birlik tehnıkasy, sondaı-aq jedel-qutqarý jasaǵy, apattar medısınasy ortalyǵy, onyń ishinde psıhologtar, qalanyń kınologııalyq qyzmeti bar, - dep habarlady Aqmola oblysy Tótenshe jaǵdaılar qyzmetiniń baspasóz qyzmeti.
Aqmola oblysy Tótenshe jaǵdaılar departamentiniń bazasynda jedel shtab quryldy, senim telefony 8 716 25 20950.
