Kudaıbergenniń ǵylymǵa qyzyǵýshylyǵy mektep kezinde bastalǵan. Aqtóbedegi qazaq-túrik lıseıinde oqyp júrgende ol Aızek Ázimovtiń robottar týraly áńgimelerine áýestenip, bolashaǵyn robottehnıkamen baılanystyrady. Osydan keıin ınnovasııalyq jobalar jasaýdy armandaıdy. Injenerdiń armany Nazarbaev ýnıversıtetinde oqyp júrgende oryndalady. Ol ózi sekildi stýdent jastarmen birigip alǵashqy jobasyn júzege asyrady.
«Alǵashqy startap stýdenttik kezimde paıda boldy. 2018 jyly kýrstastarymmen birge rentgen sýretteri arqyly 14 túrli aýrýdy anyqtaıtyn radıologııalyq jasandy ıntellekt jobasyn jasap shyǵardyq. «IEEE EMBC» atty bıomedısınalyq konferensııada jobany tanystyryp, ony kommersııalandyrýdy josparladyq. Biraq startapty ýaqytsha toqtatýǵa týra keldi, sebebi medısınalyq tehnologııalar salasyn damytýǵa kóbirek tájirıbe qajet boldy, al elimizde bul sala jetkilikti deńgeıde damymaǵan. Sondyqtan sheteldegi «MedTech» salasyndaǵy bıznestiń qalaı júrgiziletinin kórgim keldi», deıdi ol.
Shetelge baryp, bilimin jetildirýge sheshim qabyldaǵan Qudaıbergen «Erasmus Mundus Joint Master’s Degree» baǵdarlamasyna qatysýǵa ótinish berip, Fransııa, Italııa, Ispanııa elderinde oqıdy. Bul izdenis oǵan medısınalyq sýretterdi óńdeý salasynda tereń bilim alýǵa múmkindik bergen. Onyń aıtýynsha, baǵdarlamanyń artyqshylyǵy da kóp.
«Osyndaı oqý baǵdarlamalary tájirıbe jınaýǵa kóp kómektesedi. Sondyqtan izdenis jolynda júrgen jandarǵa múmkindikti paıdalanýǵa keńes beremin. Jasandy ıntellektiden bastap derekti fılm túsirýge deıin ártúrli mamandyqty ıgerýge bolady. Eń bastysy, bul bilim tegin, ýnıversıtet ushý shyǵyndaryn da ótep beredi, stıpendııasy da joǵary. Qoıylatyn negizgi talaptar – bakalavr dárejesiniń bolýy men aǵylshyn tilin jaqsy meńgerý» deıdi ınjener.
Oqýdy támamdaǵannan keıin Qudaıbergen Eýropadaǵy iri kompanııalarda jumys isteıdi. Magıstratýrada oqyp júrgen kezinde Kudaıbergen tájirıbeden ótý úshin Mıýnhendegi «iThera Medical» kompanııasyna qabyldanady. Munda ol ýltradybystyq sýretterdi qajetsiz shýdan tazartý algorıtmin jasaýmen aınalysqan. Keıin «Leıpsıgtegi Raylytic» kompanııasynan shaqyrtý alyp, rentgen sýretterinen omyrtqanyń spındik parametrlerin esepteıtin algorıtm jasap, osy taqyrypta ǵylymı maqala jarııalaıdy.
«Oqý sońynda ýnıversıtet tájirıbe ótetin kompanııalar tizimin usyndy. Biraq men jobamdy jetildirýge qatysty tájirıbe jınaǵym keldi. Laıyq oryndy ábden izdep, «Mıýnhendegi iThera Medical» kompanııasyna qabyldandym. Onda ÝDZ sýretterinen qajetsiz shýdy tazartatyn jasandy ıntellekt algorıtmin jazýmen aınalystym. Keıin kompanııa «software engineer» retinde qalýdy usyndy. Alaıda jasandy ıntellekt salasynda jumysymdy jalǵastyrýdy tańdadym. Sondyqtan basqa jumys izdedim. 70-ke jýyq kompanııaǵa ótinish berip, bir aı boıy suhbattarǵa qatystym. Nátıjesinde, Germanııanyń Leıpsıg qalasyndaǵy «Raylytic» kompanııasynan usynys aldym. Munda rentgen sýretterindegi omyrtqa parametrlerin esepteıtin algorıtm jasaýmen aınalystym», deıdi Qudaıbergen Orynbaev.
Tájirıbe jınaǵannan keıin Qudaıbergen jeke startapyn qurýǵa bel býǵan. Ol Parıjde «Entrepreneur First» baǵdarlamasyna qatysyp, seriktesimen birge medısınalyq tehnologııalar salasynda ónim ázirleýge talpynyp ta kórgen. Alaıda eýropalyq «MedTech» naryǵynyń kúrdeli ári uzaqmerzimdi úderisteriniń kóp bolýynan joba toqtap qalǵan. Bul sátsizdikke qaramastan, Qudaıbergenniń startapqa degen qyzyǵýshylyǵy arta túsedi. Tabandy eńbegi men talpynysynyń arqasynda qazir ol Parıjde ornalasqan jańa startaptyń teń quryltaıshysy. Kompanııa sporttyq is-sharalardy túsirýge arnalǵan avtonomdy robottandyrylǵan kamera ázirleýmen aınalysady. Bul kamera jasandy ıntellektiniń kómegimen fýtbol matchtaryn avtomatty túrde túsiredi.
«Bir jyl jumys istegen soń óz jobamdy jasaýǵa daıyn ekenimdi túsindim. Parıjdegi «Entrepreneur First» baǵdarlamasyna qatysyp, seriktes taýyp, oılarymdy júzege asyrýǵa múmkindik aldym. Fransýz seriktesimmen birge endometrıozdy anyqtaıtyn ónim jasadyq. Biraq «MedTech» naryǵyna shyǵý óte qıyn úderis boldy. Nátıjesinde, jobany toqtatýǵa týra keldi. Qazir parıjdik startap aıasynda ekinshi jáne úshinshi lıgadaǵy fýtbol matchtaryn túsirýge arnalǵan avtonomdy kamera jasap jatyrmyz. Qazirgi ýaqytta 80 myń eýro ınvestısııa tarttyq. Osy jyldyń qazan aıynda Marrakeshte alǵashqy resmı matchty túsirdik», deıdi ónertapqysh.
Qudaıbergen bolashaqta jınaǵan bilimin otandastyrymyzben bólisip, jastarǵa jańa múmkindikter jasaýǵa nıetti. Qazirdiń ózin de ınjener «Aqtobe Hub» alańynda dáris oqyp, jerlesterine óz tájirıbesin bólisip otyrady eken.
«Jaqynda «Aqtobe Hub»-ta Eýropadaǵy medteh kásipkerlik týraly dáris oqydym. Bolashaqta da óz bilimimdi bólisip, otandastyrymyzǵa Eýropada bilim alý nemese jumys isteý múmkindigine ıe bolýyna kómekteskim keledi. Parıj – jasandy ıntellekt salasyndaǵy mańyzdy ortalyqtardyń biri. Otandyq startaptar Eýropa naryǵyna shyǵýdy qalasa, netvorkınkke erekshe kóńil bólýi kerek», deıdi Q.Orynbaev.
Jas ınjenerdiń tájirıbesi elimizdegi ǵylym men tehnologııa salasynyń sheteldik ekojúıemen baılanysyn nyǵaıtýdyń mańyzdy ekenin aıqyndaıdy. Ol elimizdegi mamandarǵa básekege qabiletti bilim men tájirıbe jınaqtaý qajettiligin kórsetip, halyqaralyq deńgeıge shyǵý múmkindikterin keńeıtýge úles qosyp otyr.
