Prezıdent Qasym-Jomart Toqaevtyń Fransııaǵa, Emmanýel Makronnyń Qazaqstanǵa jasaǵan memlekettik sapary aıasynda strategııalyq máselelermen qatar, mádenı baılanystardy damytýdyń mańyzy atap ótilgeni belgili. Osy kelisimderge oraı Astana men Almaty qalalarynda fransýz mektepterin ashý týraly úkimetaralyq kelisim jasalǵan bolatyn.
Úkimetaralyq kelisimdi iske asyrý maqsatynda «EPG» qory men sheteldegi fransýz bilim berý júıesin damytý «AEFE» agenttigi Almatyda mektep salý jobasyn iske asyrý jónindegi kelisimge qol qoıdy.
Almatyda ashylatyn mekteptiń halyqaralyq úlgidegi attestat, tehnıkalyq pánder boıynsha joǵary sapaly bilim berý, fransýz, aǵylshyn, qazaq, orys tilderinde oqytý, balalardy úsh jastan bastap qabyldaý, sheteldik, onyń ishinde fransýz joǵary oqý oryndaryna túsý múmkindigin qarastyratyn birqatar artyqshylyǵy bar.
«EPG Education» qory qadaǵalaý keńesiniń tóraǵasy Baltabek Muqashevtyń aıtýynsha, joba bizdiń el balalaryna halyqaralyq bilim álemine jol ashady. Almatydaǵy mekteptiń qurylysy AEFE – Fransııanyń sheteldegi fransýz bilimin damytý men qoldaýǵa jaýapty memlekettik uıymynyń baqylaýymen jáne qatysýymen júzege asady. Bul agenttik Fransııanyń Eýropa jáne syrtqy ister mınıstrliginiń qaramaǵynda, álemniń 139 elindegi 580 mektepti qamtıtyn fransýz oqý oryndary jelisin basqarady. Onda 392 myńnan astam oqýshy bilim alyp jatyr. AEFE Fransııa Bilim mınıstrliginiń talaptaryna saı joǵary bilim standarttaryn qamtamasyz etýmen qatar muǵalimderdiń biliktiligin arttyrýǵa erekshe mán beretin bolady.
Qazirgi tańda «EPG» adamı kapıtaldy damytý qory Almaty qalasynda «Prometheus School» jáne «Fiztech» baǵytyndaǵy mektepterdi basqaryp otyr.
ALMATY
