Palata spıkeri mashına jasaýdy damytýdyń zańnamalyq negizderi taqyrybyna arnalǵan dóńgelek ústel jıynyna qatysty, sondaı-aq óńirdegi shoıyn quıý, avtomobıl zaýyttary men basqa da iri kásiporyndardyń ujymdarymen kezdesti.
M.Áshimbaev dóńgelek ústelge qatysýshylarǵa iltıpat bildire kelip, Memleket basshysy elimizde sapaly ekonomıkalyq ósimdi qamtamasyz etý úshin mańyzdy mindetter júktegenin atap ótti. Osy oraıda óńdeý ónerkásibi, onyń ishinde joǵary shekti jáne qosylǵan quny joǵary sektor retinde mashına jasaý salasy erekshe ról atqarady. Sondyqtan otyrys barysynda mashına jasaý isindegi ózekti problemalar kóterildi. Olardyń qatarynda qoljetimdi ári uzaqmerzimdi qarjylandyrýdyń bolmaýy, shıkizattyń qymbattyǵy, ımportqa táýeldilik, óndiriske jańa tehnologııalardy engizý sııaqty máseleler bar. Atalǵan túıtkilderdi oń sheshý úshin aldymen barlyq múddeli taraptyń kúsh-jigerin ortaq iske jumyldyrý qajet.
«Qoljetimdi ári uzaqmerzimdi qarjylandyrýdyń jetkiliksiz bolýy mashına jasaý salasynyń damýyn tejeıdi jáne onyń áleýetin tolyq iske asyrýǵa múmkindik bermeıdi. Bul jabdyq jańǵyrtýǵa, jańa tehnologııalardy engizýge jáne shyǵarylatyn ónim jelisin keńeıtýge ınvestısııa salý úshin mańyzdy. Taǵy bir másele – alıýmınıı, myrysh, mys, qorǵasyn sııaqty jetkiziletin shıkizattyń qymbat jáne shekteýli bolýy. Olardyń tizimin keńeıtý kerek. Sondaı-aq birqatar kompanııa ımporttyq jabdyqtar men tehnıka satyp alýdy jón kóredi. Bul elden kapıtaldyń ketýine ákelip soǵady jáne ózderiniń óndiristik qýatynyń damýyn tejeıdi. Osy máselelerdi sheshý úshin biz zańdarǵa tolyqtyrýlar engizý máselesin qarastyramyz. Bul iste otandyq ónimniń sapasy men básekege qabilettiligin arttyrý, satyp alý júıesin jetildirý jáne otandyq taýarlardy ishki naryqta belsendi ilgeriletý de mańyzdy shara ekenin atap ótken jón», dedi M.Áshimbaev.
Ol máslıhat depýtattarymen jáne óńir jurtshylyǵymen kezdesý barysynda Qostanaı oblysynyń ónerkásiptik áleýetine nazar aýdaryp, Senat depýtattary zańnamalyq deńgeıde qoldaý kórsetýge daıyn ekenin jetkizdi. Atap aıtqanda, is-sharada ónerkásiptik, ındýstrııalyq óndiristi ulǵaıtýǵa jáne agrarlyq sektordy damytýǵa arnalǵan jobalardy qoldaý máselesi keńinen sóz boldy.
«Prezıdent Qasym-Jomart Toqaev óz Joldaýynda aımaqtardyń ósip-órkendeýine jol ashatyn jańa óndiris oryndaryn damytýdyń mańyzdy ekenin aıtty. Qostanaı oblysy aıtarlyqtaı ónerkásiptik áleýetke ıe. Onyń ishinde taý-ken jáne mashına jasaý salalary erekshe ról atqarady. О́ńirde kóptegen mańyzdy ındýstrııalyq joba tabysty júzege asyrylyp jatyr. Qostanaı oblysynyń sharýalary eldiń azyq-túlik qaýipsizdigin qamtamasyz etýge jáne dándi daqyldardyń joǵary ónimdiligine qol jetkizýge eleýli úles qosyp keledi. Aldaǵy ýaqytta Parlament Senaty tarapynan oblystyń odan ári damýyna qoldaý kórsetýdi jalǵastyra beremiz», dedi Senat tóraǵasy.
Sonymen qatar kezdesýde Memleket basshysy Máslıhattar depýtattarynyń II respýblıkalyq forýmynda aıtqan bastamalardy tıimdi iske asyrý úshin barlyq deńgeıdegi depýtattardyń ózara is-qımylyn nyǵaıtý mańyzdy ekenine basa nazar aýdaryldy. M.Áshimbaev áriptesterin Parlamenttiń zańnamalyq jumysyna belsendi qatysýǵa jáne óńirlerdiń belgili bir máselelerin sheshý úshin tujyrymdamalyq usynystar ázirleýge shaqyrdy. Sondaı-aq ol aǵymdaǵy sessııada depýtattyq korpýs Bıýdjet, Salyq, Qurylys, Sý kodeksterimen, Bankter týraly jańa zańmen jáne Sıfrlyq kodekspen jumys isteıtinin aıtty.
«Máslıhattar zańnamalyq normalardy, atap aıtqanda, salyq zańnamasyn talqylaýǵa ári ázirleýge barynsha belsendi qatysýy qajet. Bul rette salyq saıasaty áleýmettik problemalardy sheshýdiń jáne ekonomıkalyq ósýdi yntalandyrýdyń tıimdi tetigi bolýǵa tıis. Bizdiń mindetimiz – agrosektor salasyndaǵy sharýalardyń múddelerin eskeretin, ári qaraı damýyna yqpal etetin jáne olardyń azyq-túlik qaýipsizdigine qosqan úlesin qoldaıtyn teńgerimdi salyq zańnamasyn qurý. Sondaı-aq Prezıdent atap ótkendeı, máslıhattar óńirlerdegi mańyzdy mindetterdi tıimdi iske asyra alatyn qoǵamdyq saıasatkerlerdiń jańa tolqynyn qalyptastyrý ortalyǵyna aınalýǵa tıis. Sondyqtan azamattardyń ál-aýqatyn arttyrýǵa, óńirlerdiń problemalaryn sheshýge yqpal ete otyryp, belsendi jumys isteımiz», dedi M.Áshimbaev.
Sonymen qatar sapar aıasynda Senat tóraǵasy KIA avtomobılderin shyǵaratyn zaýyt qurylysynyń barysymen tanysty. Buǵan qosa «KamLitKZ» JShS temir quıý zaýytyna, «SaryarqaAvtoProm» jáne Agromash kásiporyndaryna arnaıy bardy.
Senatorlar balalarǵa arnalǵan «Iqostanay» SMART-ortalyǵynyń shákirtterimen de kezdesti. Onda qazirgi tańda 2 myńǵa jýyq oqýshy qosymsha bilim alyp keledi. Ortalyqta 24 úıirme jumys isteıdi jáne zamanaýı tehnologııalyq quraldarmen jabdyqtalǵan kıbersport, ınjenerııa, avıamodeldeý kabınetteri, hımııa jáne fızıka zerthanalary, jańartylatyn energııa kózderine arnalǵan zerthana, akt, oqý, horeografııa zaldary bar.
