Kollajdy jasaǵan – Qonysbaı ShEJIMBAI, «EQ»
Kún raıyna baılanysty bıyl jylytý maýsymy keıbir óńirlerde mezgilinen erte bastaldy. Turǵyndar jyldaǵydaı gazdy esh qıyndyqsyz qosty. Úıdiń jylýyn emin-erkin baqylap otyr. Tabıǵı kógildir otyn tutynýshyǵa tıimdi, jaıly bolǵanymen, keıde qarapaıym qaýipsizdik sharalaryn eskermeıtinder tabylady. Tabıǵı gaz – metan. Iissiz ári tússiz. Qaýpi de sonda. Sondyqtan úıine kógildir otyn kirgizgen ár otbasy gaz mamandarynyń keńesin muqııat oryndaǵany abzal. Qalaı degende de, árkim óziniń úıine, otbasynyń amandyǵyna ózi jaýapty.
Eldiń barlyq aımaǵynda tutynýshyǵa gaz jetkizetin «QazaqGaz Aimaq» aksıonerlik qoǵamynyń mamandary turǵyndar arasynda turmystyq gazdy qaýipsiz paıdalaný jóninde túsindirme jumysyn jıi júrgizedi. Statıstıkalyq derekterge zer salsaq, sol túsindirme jumysy azdyq etip jatyr ma degen oıǵa qalasyń. Mysaly, 2022 jyldan beri el kóleminde 65 ret gaz jarylý deregi tirkelipti. Gazdan ýlaný oqıǵasy osy merzimde 232-ge jetken. Al zardap shekkenderdiń sany 634 bolsa, 233 adam qaza tapqan.
Aryǵa barmaı-aq qoıalyq, jýyqta bolǵan birneshe jaıtty mysal eteıik. Qyzylorda qalasynda zaqymdanǵan murja saldarynan úsh adam gazdan ýlanyp qaıtys bolǵan. Aral qalasynda gaz jarylyp, eki adam zardap shekken. Sondaǵysy úı ıesi gaz qosatyn oryndy ruqsat qaǵazy bylaı tursyn, biliktiligi joq mamanǵa jasatypty, ıaǵnı montaj jumystary kezinde qaýipsizdik sharalaryn saqtamaýdyń sońy jarylyspen aıaqtalyp otyr. Taǵy bir tótenshe jaǵdaı Mańǵystaý oblysynyń Munaıly aýdanynda tirkelgen. Onda qazandyqtyń murjasy syr berip, jeti adam gazdan ýlanǵan. Abyroı bolǵanda turǵyndar ajaldan aman qalypty.
О́kinishke qaraı, saqtyq sharalaryna selqos qaraýdyń saldarynan týǵan osyndaı oqys oqıǵalar kóp. Mundaı jaıttar gaz jabdyǵyn turaqty tekserip otyrýdyń mańyzyn uqtyrady. Orny tolmas ókinishke aparatyn oqıǵalardyń aldyn alý úshin qysta murjany bilikti mamanǵa bir teksertip alý artyq etpeıdi. Tehnıkalyq qyzmet kórsetý men qaýipsizdik erejelerin ár tutynýshy qatań saqtasa, qaperden shyǵarmasa, oqys oqıǵalar da tyıylady.
Gazǵa jaýapty mamandar turǵyndardy murjalardy únemi tazalap, tekserýge, qaýipsizdikke salǵyrt qaramaýǵa shaqyrady. Murjanyń bútindigin, bitelmeýin qadaǵalap, tútin tartatyn qurylǵyny únemi tekserip otyrýdy eskertedi. Ásirese qys mezgilinde murjaǵa muz qatýy múmkin. Sondyqtan gaz jabdyǵyn paıdalanar kezde gazdy avtomatty túrde óshiretin dabyl ornatý esh artyq etpeıdi. Sosyn tutynýshylar gazdy qosarda, jalǵaıtyn kezde nemese ornyn aýystyrarda bilikti mamannyń kómegine júgingeni abzal. О́ıtkeni kúmándi nemese qoldan jasalǵan gaz qondyrǵylarynyń baǵasy tıimdi bolǵanymen, sapasyna eshkim kepildik bere almaıdy.
