Atyraý sottarynda 27 175 is qaraldy

ATYRAÝ. 30 qańtar. Atyraý oblysy sottarynyń sýdıalarymen 27175 isti qaraldy. Bul týraly oblystyq sot habarlady. Sot organdarynyń jetistikteri men jiberilgen kemshilikteri taldanǵan alqa otyrysynda oblystyq sot tóraǵasy Muhtar Smaǵulov sýdıalar korpýsy úshin sot tóreligin júzege asyrýdyń sapasyn jaqsartý, sot otyrystarynyń jarııalylyǵy men qol jetimdiligin qamtamasyz etý, sot júıesiniń ımıdjin kóterýdi keńinen nasıhattaý, jemqorlyqqa qarsy batyl kúres júrgizý, sýdıalar qataryn kásibı sheberligi tómen, adamgershilik-moraldyq beınesi kúmándi adamdardan aryltý jóninde keńinen toqtaldy. Tóraǵanyń málim etýinshe, byltyr óńir sottarynda 27 175 is qaraldy. Onyń ishinde 1995-ten astamy azamattyq, 1 507 qylmystyq, 23 673-ten astam ákimshilik quqyq buzýshylyq týraly ister bar. Sýdıa medıatorlardyń qaraýyna 706 is berilgen. Sot sheshimderin shyǵarǵan kezde bas bostandyǵynan aıyrmaı jaza taǵaıyndaýdyń úles salmaǵy kóbeıe túsýde. Toǵyz adamǵa qatysty aqtaý úkimi shyǵaryldy. «Sonymen birge, byltyrǵy jyldyń shildesinen beri qoldarynda sıfrly elektrondy qoltańbalary bar azamattarǵa «Sot kabıneti» arqyly talap aryzdaryn, sot otyrystarynyń hattamalary men hattamalarǵa eskertýlerdi, usynystaryn jiberýge, elektrondy kóshirmelerin alýǵa múmkindik týdy. Osy joba aıasynda, ıaǵnı, «Sot kabıneti» arqyly 2442 elektrondy talap aryz, 9 hattamaǵa eskertý, 902 hattamanyń kóshirmesin alýǵa ótinish, 56 elektrondy shaǵym, barlyǵy 30409 ótinish kelip tústi», dedi oblystyq sottyń tóraǵasy Muhtar Smaǵulov. Joldasbek Shópeǵul. Derek, sýret: Atyraý oblystyq soty.