Aıta keteıik, semınar Mádenıet jáne aqparat mınıstrliginiń, Frankfýrt kitap jármeńkesiniń, Qazaqstan Baspagerler, polıgrafıster jáne kitaptaratýshylar qaýymdastyǵynyń, Ál-Farabı atyndaǵy Qazaq ulttyq ýnıversıtetiniń, «Nomad Culture Foundation» qorynyń qoldaýymen uıymdastyryldy.
Atalǵan is-shara baspagerlerge osy saladaǵy zamanaýı tehnologııalardy meńgerýge, halyqaralyq baılanystardy nyǵaıtýǵa jáne álemdik sarapshylarmen tájirıbe almasýǵa múmkindik beredi.
Baǵdarlama aıasynda avtorlyq quqyq pen lısenzııa satyp alý-satýdaǵy halyqaralyq tájirıbe, sondaı-aq «Frankfurt Connect» jáne «Frankfurt Rights» platformalarynyń jumysyn talqylaý sııaqty ózekti máseleler ortaǵa salyndy. Bul platformalar iskerlik qarym-qatynas pen kitap quqyn basqarýǵa arnalǵan.
Alqaly jıynda spıkerler – Nıkol Ýıtt, German Ekel, Bettına Bak jáne Vladka Kýpska baıandama jasady. Arnaıy qonaq retinde Frankfýrt kitap jármeńkesiniń prezıdenti Iýrgen Boos qatysty.
Semınarǵa jıyrma otandyq baspa men polıgrafııa salasynyń 40-tan astam mamany men oqytýshysy qatysty. 19 qarashaǵa deıin jalǵasqan is-sharada «Baspa qyzmetinde jasandy ıntellektini qoldaný: halyqaralyq tájirıbe» taqyryby da qamtyldy.
