Abaı ortalyǵy ashyldy

Ǵylymı-ádistemelik orta­lyq Abaı ýnıversıteti, «Jıdebaı-Bórili» mem­lekettik qoryq-mýzeıi jáne «Abaıtaný akademııasy» ǵylymı-zertteý ınstıtýty arasyndaǵy yntymaqtastyqty nyǵaıtýdy kózdeıdi. Sheteldegi Abaı ortalyqtarymen baılanysyn keńeıtip, uly oıshyldyń murasyn jastar arasynda nasıhattaýdyń jańa tásilderin engizý alańyna aınalady. Hakim ilimi men onyń «Tolyq adam» tujyrymdamasyn ǵylymı-ádistemelik turǵydan nasıhattaýǵa, onyń shyǵarmalary arqyly óskeleń urpaqty tárbıeleýge erekshe kóńil bóledi.

«Ortalyq jahandaný jaǵdaıynda erekshe mańyzdy bolyp tabylatyn oqý-aǵartý, ǵylymı jáne mádenı jumystar úshin zamanaýı mýzeıdiń múmkindikterin tıimdi paıdalanýǵa baǵyttalǵan. Bul mýzeıge kelýshilerdiń qataryn arttyrýdyń jańa joldaryn izdeýge, ólketaný baǵytyndaǵy mádenı týrızmdi damytýǵa, sondaı-aq mýzeı men ýnıversıtet arasyndaǵy ǵylymı-yntymaqtastyq baılanysty nyǵaıtýǵa yqpal etedi», deıdi Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq mýzeı-qoryǵynyń dırektory Ulan Saǵadıev.

Bıylǵy mamyr aıynda arnaıy bastama kóterip, mýzeıi isin damytýǵa qoldaý bildirgen Abaı atyndaǵy Qazaq ulttyq pedagogıkalyq ýnıversıtetiniń rektory Bolat Tilep ashylyp jatqan ortalyqtyń mańyzdylyǵyna toqtaldy. Uly oıshyldyń murasyn respýblıkalyq jáne halyqaralyq deńgeıde keńinen nasıhattaýǵa baǵyttalǵan negizgi bastamalardy tarqatty.

«El Prezıdenti Qasym-Jomart Toqaev uly oıshyl, ulttyq rýha­nııattyń temirqazyǵy atanǵan Abaı Qunanbaıulynyń shyǵarmashylyǵyn keńinen na­sıhattaýǵa erekshe kóńil bólýde. Abaıdyń «Tolyq adam» ilimi jastardy tárbıeleýde mańyzdy baǵdar bolsa, onyń muralaryn ulyqtaý jáne nasıhattaý ja­ýapkershiligi aqyn atymen atalatyn mádenıet, óner jáne bilim berý mekemelerine júkteledi. Uly Abaı ǵumyr keshken, qyzmet etken kıeli ólkede bolyp, osynaý abyroıly mıssııany arqaý etken «Jıdebaı-Bórili» memlekettik mýzeı-qoryǵynyń bazasynda osyndaı ǵylymı-mádenı ortalyq ashý – biz úshin úlken mártebe», dedi rektor.

Atalǵan ǵylymı-mádenı ortalyq aldaǵy ýaqytta mýzeı salasynda qyzmet atqaratyn ǵalymdarmen tyǵyz qarym-qatynasta abaıtaný ǵylymynyń aıasyn keńeıtý maqsatynda ta­nymdyq dárister ótkizip, uly tul­ǵanyń murasyn zertteý, saqtaý jáne bolashaq urpaqqa jetkizý maq­satynda jumys isteıtin bolady.

Semeı