Aǵaıyndy Ásembek pen Álembek sarbaz atanyp, sapqa turǵanyn maqtan etedi. Ásembek ómirge óz syńarynan 10 mınýt erte kelgen. Jaryq dúnıege ózinen birer mınýt qana keıin kelgen baýyryna árdaıym qamqorlyq kórsetip, úlgi bolyp keledi. Bolashaq sarbazdar Qaraǵandydaǵy №45 gımnazııada bilim alyp, keıin Astana qalasyndaǵy Indýstrıaldy tehnıkalyq kolledjine oqýǵa túsedi. Ásembek kólik slesary, al Álembek tokar mamandyǵyn tańdaıdy. Egizder oqýmen birge sportty da qatar alyp júredi. Máselen, Ásembek kıkbokspen, al Álembek MMA-men aınalysqan. Jasy on segizge kelgen kúni ekeýi de áskerı qyzmetke óz erkimen kelip, Otanǵa adal qyzmet etýdi maqsat tutqan edi. Búginde egiz uldar Ulttyq ulan qatarynda eldiń tynyshtyǵyn qorǵap, qaýipsizdigin qorǵaýda qyraǵylyq tanytyp keledi.
Áskerı bólimshede Ásembek pen Álembekten basqa, Qostanaı oblysynan kelgen Nursultan men Ersultan atty aǵaıyndylar da bar eken. Olar da ásker qatarynda qyzmet etýdi zor maqtanysh dep biledi. Ekeýi de Y.Altynsarın atyndaǵy mektepten túlep shyǵyp, Indýstrıaldyq pedagogıkalyq kolledjinde bilim alady. Oqýdy sátti aıaqtaǵan soń tynyshtyq saqshysy atanyp, el qaýipsizdigin qorǵaýǵa ózderi suranyp kelgen.
– Qaraly qańtardan keıin áskerge barýdy jón sanadyq. Basynda ata-anamyzdyń qarsy bolǵany ras. Biraq ákemiz ben aǵamyz tańdaýymyzdy qoldap, batasyn berdi. Bizdiń maqsat – Otanymyzdy qorǵaý jáne azamattyq boryshymyzdy atqaryp, úlken abyroımen úıge oralý. Ata-anamyzdyń, eldiń maqtanyshy bolýdy armandaımyz, deıdi aǵaıyndy sarbazdar.
Merzimdi qyzmetin óteýge bar ynta-jigerimen kelgen aǵaıyndylar týǵan jerdiń tynyshtyǵyn saqtaý jolynda bir-birine qoldaý kórsetip, kedergilerdi birge eńserýge sert bergen. О́zderi aıtpaqshy, ultjandylyqtyń úlgisi bolyp, el bolashaǵyna qaltqysyz qyzmet etý, bolashaq urpaqtyń alańsyz uıqysy úshin úles qosýdan asqan baqyt joq.
