Atalǵan agrokásiporyn san salaly baǵytta yrysyn eselep otyr. Negizinen mal sharýashylyǵymen aınalysady. Qazirgi ýaqytta onyń ıeliginde eki júz iri qara, júzden asyp jyǵylatyn jylqy, júz elý qoıy bar.
Tórt túlikten nesibe tapqan aǵaıynǵa aýyl sharýashylyǵy tehnıkalarynyń saqadaı saı bolýy qashanda mańyzdy. Bul sharýaǵa da Vladımır myǵym. Sharýashylyqqa qajet tehnıkanyń túr-túri bar. Olardyń buzylmaı, jyldyń kez kelgen merziminde saǵattyń mehanızmindeı sartyldap jumys istep turýyna sharýashylyq basshysy basa mán beredi.
Fermer sharýashylyǵynyń múmkindigin tek maldyń ósimimen ǵana ólshemeıdi. Egistik alqabyndaǵy sharýalardy da ıgerip, ıgiligin arttyrýdy kózdeıdi. Sóıtip, ózine tıesili 500 gektardyń jartysyna egin salyp, qalǵan 250 gektaryna arpa, bıdaı, suly egip, astyq qambasyn toltyryp aldy.
«Bıylǵy jerge salǵan ónimimiz bitik shyqty. Qambamyzdy qampaıtyp aldyq. Kóp sharýa molshylyqqa keneldi. Tókken terimizdi, eseli eńbegimizdi Jer ana eskerse dep tileımiz. Agrosalanyń qıyndyǵy kóp. Únemi izdenip, jetilip otyrmasań, sharýań irkilip qalady. Sondyqtan óziń agronom, veterınar, malshy, mehanızator bolmasań, mal bitpeıdi», deıdi fermer.
Sýretti túsirgen – Erlan OMAR, «EQ»
2017 jyly Úkimetten az paıyzben nesıe alǵan ol qorasyn asyl tuqymdy sıyrǵa toltyrady. Nesıe qarjysyna Reseıden etti ári sútti «Sımmental» tuqymynan 50 sıyr ákeledi. Sodan beri iri qaranyń kesekti eti, mol súti kól-kósir tabysqa keneltip, berekesin ári qaraı arttyrǵan kórinedi. Sharýashylyq jyl saıyn 8000 tonna et, 9 tonna sút ónimin óndirip, saýdalap otyr.
Atyrabyna «Sary qazaq» dep aty tanylǵan onyń boıynda darqandyq bar, ózinen artylǵanymen ózgege qaraılasatyn qaıyrymdy jandar qatarynan. Kásipker ózi týyp-ósken Kóktińkóli aýlyna qarasty Álıhan eldi mekenine barynsha jaǵdaı jasap otyr.
– Sharapatty is adamgershiligi joǵary, rýhanı álemi baı, jan dúnıesi taza adamdardyń ǵana qolynan keledi. Vladımır – osyndaı sanattaǵy azamattyń biri. Baryn aýylymen bólisedi. Jylda Álıhan aýlynyń jalǵyzbasty qart adamdaryna kómirin, qysqy jemshóbin túsirip beredi. Mektep aldyndaǵy 250 sharshy metr jerge asfalt tósedi. Mekteptiń akt zalyna plastıkalyq tereze ornatqyzdy. Jylda Kóktińkóli stansasynyń báıgeden ótetin maýsymashardyń bas júldesine iri qarasyn tigedi. Munymen qosa okrýgimizge qarasty Jylandy aýlynyń uzyndyǵy 9 shaqyrym kireberis jolyn jóndeýge de demeýshilik jasady. Qysta aýyldyń joldaryn qardan tazartýǵa qarjysyn da, tehnıkasyn da aıamaıdy, – deıdi Kóktińkóli aýlynyń ákimi Qýanysh Qorshabekov.
Atpal azamat Vladımırdiń muqtaj jandardyń jaǵdaıyn júregimen qabyldap, qolynan kelgenshe járdemdesýge daıyn turatyn atymtaı-jomarttyǵyn aýyldastary da rızashylyqpen aıtyp júredi. Shyntýaıtynda, batyl fermer kásipkerliktiń áleýmettik jaýapkershiligin jan-tánimen sezinedi. Týǵan aýylyn túletýge úles qosyp júrgeni de sondaı ustanymynyń arqasy bolsa kerek.
Istiń qııýyn taýyp, sharýashylyqtyń tasyn órge domalatyp júrgen kásipkerdiń otbasyn da úlgi qylýǵa bolady. Bosaǵasyna bereke, shańyraǵyna shattyq úıirilgen otaýdyń biri. Jary Natalıanyń qazany ottan túspeıdi. Bıe saýyp, qymyz ashytady. Sıyrdyń sútinen qaımaq, maı, syr, irimshik, qurt daıyndaıdy. Aq dámniń bári dastarqanda jaınap turýy kerek degen úrdis bar eken.
– Qut-berekeniń barlyǵy dastarqanyńnyń molshylyǵymen keledi. Otaǵasy jylqy etinsiz otyra almaıdy. Daladan mal túgendep kelgen kúni mindetti túrde qazanǵa et salamyn. Qonaqqa esigimiz ashyq. Jylda quran oqytyp, shekemizdi beremiz. Bizdi endi tanyǵandar ań-tań bolyp jatady. Kádimgi qanymyz da, janymyz da qazaq bolyp ketken, – deıdi fermerdiń jary.
Otbasyndaǵy uly Pavel men qyzy Lıýbov ákesiniń janynda júrip, eńbekke erte aralasqan. Bala kezinen sharýa istep, shymyr bolǵan olar sportqa jaqyn. Pavel – erkin kúresten sport sheberligine úmitker. Qyzy Lıýbov aýyr atletıkadan el namysyn baıraqty básekelerde qorǵap júr. El chempıonatynyń birneshe dúrkin jeńimpazy. Ońtústik Koreıada ótken Azııa chempıonatynyń kúmis medal ıegeri.
Vladımır Kovalchýktiń aýyl sharýashylyǵy salasyndaǵy mańdaı teri ataýsyz, eskerýsiz qalyp jatqan joq. Memlekettik baǵdarlamalar men Prezıdenttiń aýyl sharýashylyǵyn damytý baǵytyndaǵy tapsyrmalaryn júzege asyrý jolyndaǵy eńbegi birneshe márte túrli marapatpen atalyp ótken. Al isker azamat ózi jaqsylyq jasaǵan jandardan alǵys alýdy marapat bitkenniń tóresine balaıdy.
Mine, shaǵyn ǵana aýylda turyp, sharýashylyǵyn dóńgeletip qana qoımaı, aınalasyna sharapatyn tıgizip júrgen, «Sary qazaq» atanǵan azamattyń álemi osyndaı izgilikke toly.
Qaraǵandy oblysy,
Shet aýdany,
Kóktińkóli aýyly
