Bul festıvaldiń halyqaralyq deńgeıde moıyndalǵanyn jáne oǵan degen qyzyǵýshylyqtyń artqanyn bildiredi.
Eske salaıyq, mádenı is-shara 24-30 qarasha aralyǵynda Almaty qalasynda ótedi. Kıno áleminiń úzdik mamandary – rejısserler, akterler, ssenarıster men kórermender bir alańda toǵysady. Olar ózara pikir almasyp, zamanaýı kınonyń damýyndaǵy jańa ádisterdi talqylap, óz tájirıbesin bólise alady.
Festıvaldiń negizgi baıqaýlary da erekshe nazarǵa alynǵan. Halyqaralyq baıqaýǵa álem kınematografııasynyń ańyzy, Kann kınofestıvaliniń «Altyn palma butaǵy» ıegeri Nýrı Bılge Djeılan tóraǵalyq eteli. Qazylar alqasynyń quramyna sondaı-aq Rano Shodıeva, Nada Ajarı Gıllon, qazaqstandyq rejısser Erlan Nurmuhambetov jáne qyrǵyz rejısseri Artyqpaı Súıindikov bar. Al Ortalyq Azııa jáne túrki álemi elderi baıqaýynda baq synasatyn týyndylardyń eń úzdigin basqa top anyqtaıdy. Qazylar alqasynyń tóraǵasy - Lı Baohýa. Onyń shyǵarmashylyǵy negizinen mádenı mura taqyrybyna arnalǵan jáne kınosúıer qaýymnyń kóńilinen shyǵady. Qytaılyq rejıssermen birge fılmderdi marokkolyq Abdelıla El Djaýharı, reseılik Alekseı Telnov jáne otandyq prodıýser Janna Qýanysheva baǵalaıdy.
Odan bólek festıvalge Azııa elderiniń kınematografııasyna erekshe kózqaras usynatyn NETPAC qazylar alqasy qatysady. Olardyń qatarynda Nına Kochelıaeva, Gúlbara Tolomýshova jáne Andre Rafael Ivanov bar. 
Aıta keteıik, kınofestıvaldiń júlde qory 20 mıllıon teńgeden asady. Baıqaýdyń bas júldesin jeńgen fılm 4 mıllıon teńgeni qanjyǵasyna baılaıdy.
Festıval aıasyndaǵy kórsetilimder 25-30 qarasha aralyǵynda Kinopark 11 IMAX Esentai kınoteatrynda ótetinin eske sala keteıik. Mádenı is-sharanyń keń aýdıtorııaǵa qoljetimdi bolýy úshin barlyq kórsetilimder tegin ótedi.
Dástúrli festıvaldiń negizin qalaýshy jáne uıymdastyrýshy – QR Mádenıet jáne aqparat mınıstrligi. Kınofestıvaldi tikeleı uıymdastyrý Sháken Aımanov atyndaǵy «Qazaqfılm» ulttyq kınostýdııasyna júktelgen.
