Is-sharaǵa Túrkııanyń Qazaqstandaǵy Tótenshe jáne ókiletti elshisi Mustafa Kapýdjý, jazýshy Shárbaný Beısenova, sheteldik dıplomattar, jazýshylar, qazaq jáne túrik ǵalymdary men ádebıetsúıer qaýym qatysyp, týyndynyń túpki oıy týraly pikirlerin ortaǵa saldy.
Túrkııanyń Qazaqstandaǵy Tótenshe jáne ókiletti elshisi Mustafa Kapýdjý quttyqtaý sózinde túrki áleminiń birligi men ortaq is-áreketteriniń ilgeri deńgeıge jetýi ortaq basylymdar men til birligin ornatý arqyly ǵana múmkin bolatynyn jetkizdi. Osy oraıda elshi qazan aıynda ortaq túrki alfavıti qabyldanýy mańyzdy qadam ekenin aıtyp, dál osy tusta jazýshylardyń týys halyqqa ortaq shyǵarmalary kóbeıgeni quptarlyq is ekenin alǵa tartty. «Avtordyń «Súzgeniń sońǵy kúnderi» jáne «Bozoq arýy» kitabyndaǵy hıkaıattar da qazaq mádenıeti men tarıhynan nár alǵan áıel keıipkerlerdi oqyrmanǵa tereń maǵynada tanyta bilgen. Bul shyǵarmalar qazaq qoǵamynyń qaısarlyq rámizi – áıelderge degen qurmetin kórsetedi», dedi ol.
Súzge hanym oqyrmanyn kúreskerligimen, kishipeıildiligimen, jaryna jáne óz ultynyń qundylyqtaryna degen adaldyǵymen baýraıdy. Túrikshege aýdarylǵan shyǵarma týraly jasaǵan baıandamasynda Túrkııanyń Qazaqstandaǵy elshiliginiń mádenıet jónindegi keńesshisi Zúlfú Toman osylaı deıdi. Onyń sózinshe, Grozanyń basqynshylyǵyna toıtarys bergen Súzgeniń kúıeýi Kóshim hannyń ómiri sońyna deıin arpalyspen ótken azapty kúresi, Súzgeniń qorshaýda qalǵan shaǵyn qamalynda kórsetken qarsylyǵy oqyrmannyń jan-dúnıesinde úlken daýyl týdyrady.
Al Qazaq ulttyq óner ýnıversıtetiniń professory Roza Muqanova «Súzgeniń sońǵy kúnderi» hıkaıatyndaǵy Súzgeniń qaıratkerligin aıryqsha atap ótti. «Súzgeniń el basyna kún týǵandaǵy sáti, alapat jan-dúnıesi, tuńǵıyqqa batyp bara jatyp jan ushyrǵan tragedııalyq taǵdyry. Sońǵy demine deıin han buıryǵyn, han sheshimin kútýi shyǵarmany shıryqtyra, shıelenistire túsedi. Túrki halqyna ortaq mádenıet, ortaq salt-dástúr, bekzadalyq, jaryna adaldyq, jaýapkershilik qashanda saltanat qurǵan. Ol Súzge hanymnyń beınesin asqaqtatyp, kúreskerligin, batyl sheshim qabyldaıtyn qaıratkerligin áıgileıdi. Shyǵarma osy tusymen irgeli, súbeli ádemi kórkem beıne jasaǵan», dep tobyqtaı túıinin jetkizdi.
Eýrazııa ulttyq ýnıversıtetiniń túrik tili oqytýshysy Haırýnnısa Topchý Súzge hanymdy keıipker retinde daralap, hıkaıadaǵy basqa áıel keıipkerlerinen ózgeshe qylatyn qyryna toqtaldy. Ol túrki qyzdaryna tán batyldyq, izgilik, danalyq jáne erkindikke degen qulshynysty kórgenin, Súzgeniń boıyndaǵy osy bir daralyq túrki qyzdarynyń tarıhı rámizi ekenine toqtaldy.
Tanystyrylym keshine kelgen qatysýshylar arasynda da sonaý kók túrikter qaǵanaty tarıhyndaǵy áıelderdiń saıası orny men áskerı áreketterdi ıgerip, bılikke yqpal etkeni týraly pikir uzaqqa jalǵasty. Tipti is-sharanyń sońynda avtordan qoltańba alǵan oqyrmandar Súzgeniń danalyǵy men qaıratkerlik qasıetin tamsana tyńdady. Tarıh qoınaýynda qalǵan kúresker áıeldiń tabandylyǵy búgingi urpaqtyń boıynda jalǵasyn tapsa, avtordyń aıtary oqyrman júreginen oıyp oryn alǵany.
