Forým 2 jylda bir ret ótkiziledi jáne bul - qylmystyq quqyq salasyndaǵy reformalardyń ózekti máselelerin talqylaýǵa arnalǵan halyqaralyq alań. Onyń jumysyna memlekettik jáne quqyq qorǵaý organdarynyń basshylary, Parlament depýtattary, advokattar, halyqaralyq uıymdardyń, joǵary oqý oryndarynyń, azamattyq qoǵam ókilderi, sondaı-aq Qyrǵyzstan, О́zbekstan, Tájikstan, Túrkimenstan, Mońǵolııa sarapshylary qatysty.
Jıyn barysynda Joǵarǵy Sot Tóraǵasy Aslambek Merǵalıev forýmǵa qatysýshylarǵa jyly lebizin bildire otyryp, Qazaqstandy proseske qatysýshylardyń barlyǵynyń quqyqtaryn qurmetteýge jáne qorǵaýǵa baǵyttalǵan teńgerimdi júıeniń myqty jaqtaýshysy retinde atap ótti.
Sondaı-aq 30 jyl ishinde naqty bas bostandyǵynan aıyrýǵa sottalǵandar úlesiniń turaqty túrde 60%-dan 38%-ǵa deıin tómendegenin jáne qoǵamnan oqshaýlaýmen baılanysty emes balamaly jazalardy qoldaný týraly málimet berdi.
Sonymet qatar aýyr jáne asa aýyr qylmystar úshin sottalǵandardy shartty túrde merziminen buryn bosatý jáne jazany aýystyrý týraly ótinishterdi engizý josparlanyp jatqany aıtyldy. Buǵan qosa aldyn alý sharasyn tańdaý kezinde apellıasııa róli kúsheıtilip, elektrondy bilezikterdi qoldaný keńeıdi.
Bul Qazaqstanǵa Zań ústemdigi ındeksinde 142 eldiń ishinde 65-orynǵa kóterilýge múmkindik beredi.
Odan keıin Joǵarǵy Sot Tóraǵasy kassasııalyq sottardy qurý máselesine de toqtalyp, qylmystyq proseste taraptardyń jaryspalylyǵy men teń quqyqtylyǵyn nyǵaıtý, tergeý sýdıalarynyń ókilettikterin keńeıtý jóninde usynystar aıtty.
BUU nashaqorlyqpen jáne qylmyspen kúres basqarmasynyń Aýǵanstan, Ortalyq Azııa, Iran jáne Pákistan boıynsha aımaqtyq ókili, doktor Olıver Shtolpe óz sózinde zańgerlerdiń kásibı quzyrettiligin arttyrýǵa, qoǵamnyń turaqtylyǵyn nyǵaıtýǵa, sonyń ishinde uıymdasqan qylmys, esirtki bıznesi jáne sybaılas jemqorlyq syn-qaterlerine tap bolǵan jastarǵa, sondaı-aq Ortalyq Azııadaǵy aımaqtyq yntymaqtastyqty keńeıtýge baǵyttalǵan jumystaryn aıtty.
Onyń pikirinshe, saraptamalyq forým osy saladaǵy negizgi qatysýshylardy – sýdıalardy, prokýrorlardy, quqyq qorǵaý organdarynyń qyzmetkerlerin, advokattardy, azamattyq qoǵam ókilderi men halyqaralyq sarapshylardy biriktirýge biregeı múmkindik beredi.
Forým aıasynda túrli baǵyttar boıynsha birneshe sessııa uıymdastyryldy.
