Otyrys kezinde Dostastyq elderi Parlamentteriniń depýtattary saılaý úderisin halyqaralyq baıqaý ınstıtýtynyń demokratııa men saılaý mádenıetin damytýdaǵy rólin talqylady. Bul rette Senat tóraǵasy óńirdegi elder yntymaqtastyǵynyń mańyzdy baǵyttarynyń biri saılaý men referendýmdardy ótkizýge monıtorıng júrgizý bolyp qala beretinin atap ótti.
«Qazaqstan Prezıdenti Qasym-Jomart Toqaev qazan aıynda Máskeýde ótken TMD memleketteri basshylarynyń sammıtinde bizdiń elderimiz úshin Dostastyqtyń áleýetin odan ári nyǵaıtý men onyń bedeldi halyqaralyq uıym retindegi rólin arttyrý sózsiz basymdyq ekenin atap ótti», dedi M.Áshimbaev.
Sondaı-aq palata spıkeri halyqaralyq baıqaý ınstıtýty Dostastyq keńistigindegi saılaý úderisteriniń mańyzdy jáne ajyramas bóligine aınalyp, olardyń ashyqtyǵyn arttyrýǵa yqpal etkenin alǵa tartty.
«Halyqaralyq baıqaý degenimiz – saılaý rásimderiniń saqtalýyn tekserý ǵana emes, sonymen qatar zańnyń ústemdigin jáne memleket pen qoǵam arasyndaǵy dıalogti qoldaýdyń mańyzdy tetigi. Bul tásil saılaý úderisteriniń halyqaralyq standarttarǵa sáıkestigin qamtamasyz etýge ári olarǵa degen senimdi nyǵaıtýǵa múmkindik beredi. Baıqaý úderisi egemendik pen memlekettilikti qurmetteý qaǵıdattaryna negizdeletinin atap ótken jón. Bul rette halyqaralyq baıqaý mıssııalarynyń qyzmeti obektıvti jáne ashyq sıpatta bolady», dedi Senat spıkeri.
Sonymen qatar M.Áshimbaev parlamenttik dıalogtiń memleketaralyq yntymaqtastyqty nyǵaıtýdaǵy mańyzy týraly aıtyp, Memleket basshysy Qasym-Jomart Toqaevtyń bastamasymen iske asyrylyp jatqan Qazaqstannyń qoǵamdyq-saıası ómirindegi reformalarǵa toqtaldy.
«Qasym-Jomart Toqaev atap ótkendeı, demokratııa degenimiz – nátıje emes, óz eliniń taǵdyryna beıjaı qaramaıtyn azamattardyń turaqty qatysýyn talap etetin úderis. Biz Qazaqstandaǵy bılik ınstıtýttarynyń saılanbalylyǵyn keńeıtip jatyrmyz. Aýyldyq eldi mekenderdiń ákimderin saılaýdy qalyptastyrdyq. Endi aýdan ákimderin saılaýdy qolǵa aldyq», dedi M.Áshimbaev.
Buǵan qosa Senat spıkeri Memleket basshysynyń bastamasymen júrgizilip jatqan reformalar aıasynda qazirgi tańda elimizde asa mańyzdy máseleler referendýmǵa shyǵarylatynyn aıtty.
«Qazaqstanda ótkizilgen AES salý máselesi jónindegi respýblıkalyq referendým barlyq mańyzdy sheshimdi el azamattarynyń pikirin eskere otyryp qabyldaýǵa úndeıtin «Halyq únine qulaq asatyn memleket» saıasatynyń jarqyn kórinisine aınaldy. Alǵash ret referendýmǵa ekonomıkalyq sıpattaǵy másele shyǵaryldy. Daýys berý úderisine 40 myńnan asa ulttyq jáne 30 elden kelgen 170 halyqaralyq baıqaýshy monıtorıng júrgizdi. Baıqaý qorytyndysynda TMD mıssııasy referendýmnyń el zańnamasyna jáne halyqaralyq standarttarǵa sáıkes erkin ári ashyq ótkizilgenin jetkizdi. Biz TMD baıqaýshylar mıssııasyna osyndaı obektıvti jáne syndarly baǵalaý úshin rızashylyǵymyzdy bildiremiz», dedi M.Áshimbaev.
Senat spıkeri birlesken jumystyń aldaǵy kezeńdegi basym baǵyttaryn belgilep, 2025 jyly TMD-ǵa tóraǵalyq etetin Tájikstan Respýblıkasyn quttyqtady.
Otyrys barysynda qatysýshylar TMD Parlamentaralyq assambleıasynyń agrarlyq saıasat, tabıǵı resýrstar jáne ekologııa jónindegi turaqty komıssııasynyń tóraǵasy laýazymyna Qazaqstan Parlamenti Senatynyń depýtaty Olga Býlavkınanyń kandıdatýrasyn bekitti. Al senator Gennadıı Shıpovskıhti TMD Jastar Parlamentaralyq assambleıasynyń úılestirýshisi etip taǵaıyndaý týraly sheshim qabyldady.
Palata tóraǵasy TMD PAA alańynda parlamenttik delegasııalardyń basshylarymen birqatar ekijaqty kezdesýler de ótkizdi.
Belarýs Respýblıkasy Ulttyq Jınalysy keńesiniń tóraǵasy Natalıa Kochanovamen kezdesýde M.Áshimbaev kópjaqty alańdar aıasyndaǵy ózara is-qımyl, sondaı-aq saýda-ekonomıkalyq jáne mádenı-gýmanıtarlyq baılanystardy nyǵaıtý jónindegi aýqymdy máselelerdi talqylady.
Senat spıkeri Tájikstan Respýblıkasynyń Madjlısı Olı Madjlısı mıllı tóraǵasy Rýstamı Emomalımen kezdesý barysynda Parlament depýtattarynyń óńirdiń ekonomıkalyq damýy jolyndaǵy birlesken kúsh-jigeri jóninde pikir almasty. Máýlen Áshimbaev tájik parlamentshilerin «Ortalyq Azııanyń ornyqty damýy: Parlamentter men jergilikti ókildi organdardyń róli» taqyrybyna arnalǵan parlamenttik komıssııanyń keńeıtilgen otyrysyna qatysýǵa shaqyrdy. Atalǵan is-sharany bıylǵy jeltoqsan aıynda Astanada ótkizý josparlanyp otyr.
Máýlen Áshimbaev О́zbekstan Respýblıkasy Olıı Májilisi Senatynyń tóraǵasy Tanzıla Narbaevamen kezdesýde áriptesin 27 qazanda atalǵan elde demokratııa men memlekettiń saıası júıesin damytýdyń jańa kezeńin belgilep bergen saılaýdyń sátti ótýimen quttyqtady.
Reseı Federasııasy Federaldyq Jınalysy Federasııa Keńesiniń tóraǵasy Valentına Matvıenkomen suhbat barysynda Máýlen Áshimbaev parlamenttik dıalogtiń memleketaralyq yntymaqtastyq jáne ózekti máselelerge qatysty syndarly sheshimder qabyldaý kezindegi mańyzdy róline nazar aýdardy. Sonymen qatar ol Qazaqstan Parlamentiniń Senaty men Reseıdiń Federasııa Keńesi arasyndaǵy Yntymaqtastyq jónindegi komıssııa qyzmetiniń nátıjelerine jáne aldaǵy ýaqytta Parlamentaralyq yntymaqtastyqty damytýdyń 2025–2027 jyldarǵa arnalǵan jol kartasyna qol qoıýdyń mańyzyna toqtaldy.
