Kendi Altaıda

fýtbol akademııasy ashylady, hokkeı qaıta túleıdi Shyǵys Qazaqstan – saıyp­qyran sportshylar týǵan, Olım­pıada men álemdik doda­lardyń jeńimpazdaryn syılaǵan óńirlerdiń biri. Kendi Altaıdyń bolmysy shyǵar, bul ólkeden túlep ushqan jas sportshylar záýde bir bıikti baǵyndyrmaı qaıtpaıdy. Búginde óńir jurtshylyǵynyń sportpen shuǵyldanýyna, salamatty ómir saltyna kóńil bólýine memleket tarapynan barlyq jaǵdaı jasalýda. Alda shyǵysqazaqstandyq sportsúıer qaýymdy tyń jańalyqtar kú­tip tur. Taıaýda oblys ákimi Da­nıal Ahmetov sportshylar qaýymdastyǵymen júzdesýinde bul týraly tarqatyp aıtty. Oblys sportynyń damý máselelerin talqylaǵan jıynda halyqaralyq jarystarda jeńimpaz atanyp, júldege ıe bolyp júrgen shy­ǵysqazaqstandyq sportshylar marapattaldy. О́skemendegi Me­tallýrgterdiń mádenıet saraıynda ótken jıynda sportshylar 150 myń teńgeden 1 mıllıon teńgege deıingi oblys ákiminiń stıpendııasyna ıe boldy. Stıpendııa ıegerleri qatarynda Olımpıada chempıony Olga Rypakova, shańǵy jarysy boıynsha Álem kýbogy kezeńiniń jeńimpazy, 2015 jylǵy Álem chempıonatynyń qola júldegeri Alekseı Poltoranın, frıs­taıldan Búkilálemdik qysqy ýnıversıada jeńimpazy Iýlııa Galysheva, frıstaıldan Álem chempıonatynyń kúmis júldegeri, Ýnıversıadanyń kúmis júldegeri Dmıtrıı Reıherd, erkin kúresten Azııa chempıony Rasýl Qalıev jáne taǵy basqa belgili sportshylar bar. Elimizdiń ulttyq quramasy sapynda óner kórsetip, oljaly qaıtyp júrgen qaısar ul-qyzdardy quttyqtaǵan oblys basshysy Shyǵys Qazaqstanda sportty damytý salasynda atqarylar jumystarǵa toqtaldy. О́ńir basshysynyń aıtýynsha, jaqynda О́skemende fýtbol akademııasy qurylady. Jumysty uıymdastyrý úshin shetelderden mamandar shaqyrylady. Qazirgi ýaqytta atalǵan akademııaǵa nemis, ıspan fýtbol mektepteriniń tájirıbelerin paıdalaný máse­leleri qarastyrylýda. Bul oraıda bes jyl boıy óńirdiń talantty sportshylaryn tár­bıeleýmen shuǵyldanatyn já­ne óz tájirıbesin jergilikti jattyqtyrýshylarmen bólisetin joǵary kásibı bilikti mamandar shaqyrý kózdelip otyr. – Biz eger álemdik fýtbol derja­vala­ryndaǵydaı balalar fýtbolyn damytýdy qolǵa almasaq, jaqsy nátıjege eshqashan qol jetkize almaımyz. Al fýtbol akademııasyn qurýdyń nátıjesinde balalarymyzda joǵary kásipqoılyq paıda bolady, laıyqty bilim alady, sapaly medısınalyq qyzmetke qol jetkizedi. Árıne, birinshi kezekte biz tek sporttyq jarystardyń jeńimpazdaryn ǵana emes, óz elimizdiń laıyqty azamattaryn tárbıeleıtinimizdi este ustaýymyz qajet, – dedi óńir basshysy. Endi Semeı men О́skemen qalalaryndaǵy fýtbol klýbtarynyń ornyna bir ǵana «Altaı» klýby jumys isteıdi. Teńbil dop tebýdi úıretetin mektepter men jańa akademııa atalǵan klýbty oıynshylarmen qamtamasyz etedi. Oblys ákimi úzdik sporttyq alańdar jáne sý basseınderi óńirimizdiń negizgi baılyǵy sanalatyn balalarǵa berilgenin atap ótti. Iаǵnı olardyń arasynan keleshekte bıikti baǵyndyratyn myqty sportshylar shyǵatyn bolady. – Biz óskemendik «Torpedo» komandasynyń dańqyn qaıtarýy­myz tıis. Sondyqtan jas hokkeı­shilerdi óz isiniń sheberi etip tárbıe­leý kerek. Bul úshin Eýropa men Soltústik Amerıka, Reseı elderinen belgili bapkerlerdi shaqyrýymyz, jańa muz alań­daryn salýymyz qajet, – dedi oblys ákimi – Shaıbaly hokkeıdi shyńǵa shyǵarý úshin «Torpedo» klýbynyń burynǵy ataýy qaıtarylyp, onyń laıyqty óner kórsetýine qolaıly jaǵdaı jasalýda. Atap aıtqanda, úsh úlken bazalyq klýb, eki farm-klýb quryldy. О́skemende úsh hokkeı modýli bar. Jyl sońyna deıin Rıdder men Zyrıanda hokkeı modýlderi ashylady. Hokkeıdi damytýǵa Úrjar men Aıagóz aýdandary da qatysady. Atalǵan aýdandarda keler jyly jańa muz aıdyny kesheni boı kótermek. – Semeı qalasynda 200 adam­dyq sport ınternatyn salyp, oǵan sporttyq áleýeti myqty balalardy ornalastyramyz. Pan­sıonattyń janyna jańa medısınalyq jabdyqtarmen jaraq­tandyrylǵan zamanaýı ońaltý ortalyǵy paıdalanýǵa beriledi, – dedi D.Ahmetov. Dál osy ispetti jumystar sambo, boks, dzıýdo salalaryn damytý boıynsha da júrgiziletin bolady. Al Rıdder qalasynda aýyr atletıka boıynsha mamandandyrylǵan mektep qurylysyn júrgizý josparlanyp otyr. Qazirgi kezde Shyǵys Qazaqstan oblysynda sporttyń 88 túrimen shuǵyldanýǵa arnalǵan 3232 sport nysandary qyzmet etedi. Dýman ANASh, «Egemen Qazaqstan». О́SKEMEN.