Depýtat Májiliste esirtki óndirýshilerine jazany kúsheıtýge baǵyttalǵan mańyzdy zań jobasy talqylanyp jatqanyn jetkizdi.
- Jazany ómir boıyna bas bostandyǵynan aıyrýǵa deıin qataıtý usynyldy. Bul – ádiletti sheshim. Depýtattar osy normany qoldap daýys berdi. Alaıda budan da kúrdeli másele bar: qylmyspen kúresýi tıis azamattar ózderi esirtki bıznesine aralasqan kezde ne bolady? Biz quqyq qorǵaý organdarynyń qyzmetkerleri men ózderiniń laýazymyn, qyzmettik múmkindikterin jáne aqparatqa qoljetimdilikti paıdalanyp, esirtki aınalymyna qatysqan ózge de laýazymdy tulǵalarǵa ómir boıyna bas bostandyǵynan aıyrý jazasyn engizý týraly usynys jasadyq, – dep jazdy Ashat Aımaǵambetov telegram arnasyndaǵy paraqshasynda.
Depýtattyń pikirinshe, eger olardyń kinási dáleldense, mundaı áreketter eń qatań túrde jazalanýǵa tıis.
- Sebebi bul – azamattardyń múddesine jasalǵan satqyndyq, qoǵam senimine nuqsan keltirip, eldiń qaýipsizdigine qater tóndiredi. Memleket basshylyǵy esirtki bıznesimen jáne onyń taralýymen kúresti ymyrasyz jáne júıeli túrde júrgizip jatyr. Qoǵam úshin úlken qaýip tóndirip otyrǵan osy máseleni joıýǵa baǵyttalǵan esirtkige táýeldilikpen kúres jónindegi keshendi jospar bekitildi. Sonymen qatar, ulttyq qaýipsizdikti nyǵaıtatyn qosymsha sharalar da qabyldanyp jatyr, – dep túıindedi Ashat Aımaǵambetov.
