Foto: Ǵylym jáne joǵary bilim mınıstrligi
Lord Maık German óziniń saıasatker retinde qalyptasý jolyna toqtalyp, Qazaqstan týraly áserimen, bilim berýdiń mańyzdylyǵy týraly oılarymen bólisti.
«Saıasatkerdiń mindeti – qoǵam ómirin jaqsartý. Meniń mindetim – zańdardy qurý jáne ózgertý, azamattardyń salyqtary esebinen qalyptasatyn elimizdiń bıýdjeti qalaı jumsalatynyn sheshý jáne saıyp kelgende, halyqtyń ómirin qalaı jaqsartý keregin oılastyrý», dep atap ótti spıker.
Ulybrıtanııa Lordtar palatasynyń múshesi Qazaqstanǵa sapary kezinde alǵan áserin ortaǵa saldy.
«Dúnıejúzi tarıhynda Shyǵys pen Batys arasyndaǵy baılanystar Jibek joly arqyly júzege asqany belgili. Sizderdiń elderińizdiń tarıhy adamdardyń, taýarlar men qyzmetterdiń Shyǵys pen Batys arasyndaǵy qozǵalysyna negizdelgen. Jibek joly búginde de óz mańyzyn joǵaltqan joq. Bul turǵyda sizderdiń artyqshylyqtaryńyz – eki jaqty baılanystyrý qabiletińizde jatyr. Bizdiń qarym-qatynasymyzdy nyǵaıtý asa mańyzdy dep sanaımyn», dedi.
Lord Maık German jastarǵa arnaǵan sózinde olardy tek bilimdi meńgerip qana qoımaı, strategııalyq jáne synı turǵydan oılaý qabiletin damyta otyryp, ony qoldana bilýge shaqyrdy. Ol sondaı-aq Qazaqstan jastarynyń el bolashaǵyn aıqyndaıtyn sheshimder qabyldaý úshin kózqarasy men qajetti daǵdylary bolýy tıis ekenin aıtty.
Sonymen qatar qonaq stýdentterdiń probasııa qyzmeti, Ortalyq Azııa elderiniń áleýeti, Ulybrıtanııanyń ǵylymı basymdyqtary týraly suraqtaryna jaýap berip, tabysty saıasatker bolý týraly keńesterin bólisti.
Jıyn sońynda EUÝ-dyń strategııalyq damý jáne ınternasıonaldandyrý jónindegi prorektory Dýman Aıtmaǵambetov Ulybrıtanııanyń Lordtar palatasynyń múshesi Maık Germanǵa L.N.Gýmılev atyndaǵy EUÝ-dyń Qurmetti professory ataǵyn berý týraly sheshim qabyldaǵanyn jetkizdi.
