Oblystyń bas reprodýktologi Gúlnár Esqaıyrovanyń málimetine súıensek, byltyr atalǵan baǵdarlamaǵa qatysqan analar 51 sábıdi ómirge ákelipti. Nárestelerdiń arasynda 6 egiz bolǵan. Endi 54 ana bala kútip júr.
«Elimizde 5 jylǵa arnalǵan «Ańsaǵan sábı» baǵdarlamasy iske asyrylyp jatyr. Keıingi eki jylǵy kórsetkishpen salystyrǵanda, bıyl ekstrakorporaldy uryqtandyrýǵa beriletin kvota sany eki ese artty», dep habarlady G.Esqaıyrova.
Onyń aıtýynsha, kvota alýǵa nıetti jup ózi tirkelgen emhanaǵa ótinish bildirýi qajet. Keıin bedeýlik boıynsha dıspanserlik baqylaýǵa alynady. Tolyq medısınalyq zertteý júrgizilip, oblystyq perınataldyq ortalyǵynyń gınekolog-reprodýktologterine joldama beredi.
Atyraý oblystyq perınataldyq ortalyǵy jansaqtaý bóliminiń neonatolog dárigeri Aslan Muqanovtyń aıtýynsha, jyl basynan beri 10 myń 522 sábı ómirge kelgeni tirkelip otyr. Onyń ishinde shala týǵan 482 náreste bar.
«Byltyr 11 myń 326 sábıdiń 502-si merziminen buryn dúnıege kelgen edi. Al bıyl ómirge 10 myń 522 náreste dúnıege keldi. Onyń arasynda 482 sábıdiń shala týǵany tirkeldi. Merziminen buryn týǵan sábılerdiń kútimi erekshe bolýy qajet. Qazir perınataldyq ortalyqtyń jansaqtaý bóliminde 10-ǵa jýyq sábı jatyr. Shala týǵan náresteniń biriniń salmaǵy óte jeńil – 690 gramm», deıdi A.Muqanov.
Dárigerdiń deregine qaraǵanda, perınataldyq ortalyqta 25 neonatolog bar. Olar shala týǵan nárestelerdiń densaýlyǵyn udaıy baqylaıdy.
«Jalpy, 22 aptada 500 gramm salmaqpen dúnıege kelgen sábıler shala týǵan bolyp esepteledi. Biraq budan az salmaqpen ómirge keletin nárestelerde kezdesedi. Máselen, on shaqty jyl buryn Atyraý oblystyq perınataldyq ortalyǵynda bir sábı jarty kıloǵa jetpeıtin 450 gramm salmaqpen ómirge keldi. Biz náresteniń qatarǵa qosylýy úshin qoldan kelgen kómegimizdi aıamadyq. Qazir onyń jasy 13-te», dep málimdedi A.Muqanov.
Atyraý oblysy
