Foto: Pavlodar oblysynyń ákimdigi
Esterińizge sala keteıik, Pavlodar aýdanyn 2023 jyldyń qańtarynan bastap basqarǵan Nıkolaı Dychko óz erkimen qyzmetinen bosatylǵan edi.
Dıdar Elýbekuly 1992 jyly Jelezın aýdanynda dúnıege kelgen. 2014 jyly S. Toraıǵyrov atyndaǵy Pavlodar memlekettik ýnıversıtetin «Quqyqtaný» mamandyǵy boıynsha aıaqtaǵan.
Eńbek jolyn 2009 jyly QR Bas prokýratýrasynyń quqyqtyq statıstıka jáne arnaıy esepke alý komıtetiniń aýmaqtyq organynda bastaǵan.
2022 jyldan bastap osy ýaqytqa deıin Pavlodar oblysy ákimi apparatynyń basshysy qyzmetin atqarǵan.
Asaıyn Baıhanov oblystyń eń iri aýdandarynyń birine taǵaıyndalǵan jańa basshynyń aldyna birinshi kezektegi mindetterdi qoıdy.
«Aýdan ınvestısııa tartý áleýetine ıe. Alaıda, ókinishke qaraı, AО́K, áleýmettik jáne týrıstik salalarǵa, aýdan úshin strategııalyq óńdeýshi ónerkásipke ınvestısııa tartý jumystary óte tómen deńgeıde. О́ńir basshysy ınvestısııa tartý jáne jańa jumys oryndaryn ashý jumystaryn jandandyrýdy tapsyrdy. Sondaı-aq, Pavlodar aýdanynyń ákimdigi aǵymdaǵy jyldyń 10 aıynyń qorytyndysy boıynsha tıimdilik reıtınginde aýtsaıder bolady. Bıylǵy jyly aýdannyń keıbir memlekettik qyzmetshileri tikeleı fýnksıonaldyq mindetterin oryndaýdyń ornyna sotty jaǵalap ketti. Bul memlekettik qyzmetshilerdiń halyq aldyndaǵy senimi men bedeline nuqsan keltiredi. Búgingi tańda aýdanda 9 bos jumys orny bar. Bıznes-prosesterdi durys qurý, qolda bar bos jumys oryndaryna konkýrstar jarııalaý qajet. Kadr saıasaty naqty tujyrymdalyp, barlyq qyzmetkerler úshin ashyq bolýy kerek», dedi oblys ákimi.
Sonymen qatar óńir basshysy Kemeńger aýylyndaǵy dene-shynyqtyrý saýyqtyrý kesheni, shaǵyn ortalyqqa arnalǵan Zańǵar mektebine qosymsha ǵımarattyń qurylysy sekildi másele týyndaǵan nysandarmen aınalysyp, paıdalanýǵa berý qajettigin tilge tıek etti.
