Foto: rail-news.kz
Prezıdenttiń Qazaqstandy tolyqqandy kólik-logıstıkalyq habqa aınaldyrý jónindegi alǵa qoıǵan mindetterin iske asyrý sheńberinde elimizde aýqymdy ınfraqurylymdyq jobalar iske asyrylyp jatyr:
- 2023 jyldan bastap 2,8 myń shaqyrymnan astam temirjol jóndeldi;
- Jyljymaly quramdy jańartý úshin 2024 jyly 185 lokomotıv satyp alyndy, 800 ashyq vagon, 143 jolaýshylar vagony paıdalanýǵa berildi;
- Qyzylorda, Shymkent, Pavlodar jáne Túrkistan qalalarynda vokzaldarǵa kúrdeli jóndeý júrgizildi.
Oljas Bektenov qabyldanǵan sharalar nátıjesinde 2029 jylǵa qaraı tranzıttik tasymaldaý kólemi 28 mln-nan 45 mln tonnaǵa deıin ulǵaıatynyn, onyń ishinde tranzıt 2 mln jıyrma fýttyq konteınerge deıin ósetinin atap ótti. Sondaı-aq ol halyqaralyq kólik dálizderindegi qazaqstandyq marshrýttardyń básekege qabilettiligin arttyrý jáne salany jańǵyrtý boıynsha kúsh-jigerdi arttyrý qajettigine toqtaldy.
Temirjol salasyn damytýdyń 2029 jylǵa deıingi tujyrymdamasyn iske asyrý sheńberinde kelesideı jumystar josparlanǵan:
- 11 myń shaqyrym temirjol ýchaskelerin jóndeý, 5 myń shaqyrymǵa jýyq jańa jáne ekinshi joldar salý, 2,6 myń shaqyrymǵa avtobuǵattaý jasaý, 184 stansany jańǵyrtý;
- THKB baǵyty boıynsha konteınerlik poezdar sanyn jylyna 400-den 3 myń birlikke deıin ulǵaıtý;
- 1,2 myńǵa jýyq jolaýshylar vagonyn satyp alý;
- Darbaza–Maqtaaral jáne Baqty–Aıagóz t/j jelilerin salý, Dostyq–Moıynty t/j ýchaskesiniń ekinshi joldaryn jáne Almaty aınalma jelisin salý;
- Jalpy uzyndyǵy 1,3 myń km bolatyn 4 temirjol jobasyn iske asyrý;
- 2025 jyly 187 lokomotıv satyp alý, kelesi 3 jylda – taǵy 257 birlik jetkizý.
