Prezıdent Qazaqstan men Reseıdiń saıası yntymaqtastyǵy men ekonomıkalyq seriktestigi joǵary deńgeıde órbip jatqanyna keńinen toqtaldy.
Aıta keteıik, qazir Qazaqstanda Reseıdiń 23 myń kompanııasy tabysty jumys istep jatyr. Onyń 4 myńy sońǵy bir jyldyń ishinde quryldy. Eki el arasyndaǵy yntymaqtastyq qarqyny joǵary ekeni osydan-aq baıqalady.
«Ekijaqty ınvestısııa kólemi de ulǵaıa tústi. 2023 jyly Reseı kompanııalary Qazaqstanǵa 3 mıllıard dollardan astam ınvestısııa saldy. Qazaqstan da Reseı ekonomıkasyna osynsha mólsherde qarjy quıdy. Elderimiz bıznes júrgizýge qolaıly orta qalyptastyryp, ınvestorlardy qoldaýǵa qajetti barlyq jaǵdaıdy jasap otyr. Qazaqstan men Reseı energetıka, ónerkásip, kólik-logıstıka, aýyl sharýashylyǵy jáne basqa da kóptegen salada birlesip, aýqymdy jumys júrgizip keledi. Osyǵan deıin jalpy quny 18 mıllıard dollardan asatyn 90-nan astam joba iske qosyldy. Qazir de bolashaǵy zor 49 joba júzege asyrylyp jatyr», dep jazdy Qasym-Jomart Toqaev.
Osy mańyzdy jobalardyń ishinen Qazaqstanda 3 jylý elektr ortalyǵynyń qurylysy bastalǵanyn jáne Ekibastuz GRES-in jańǵyrtý jumystaryn atap ótýge bolady. Bul qatarda Qazaqstannyń birqatar aımaǵyn gazben qamtamasyz etýge, sondaı-aq, ońtústik jáne shyǵys baǵytqa tasymaldanatyn Reseı energetıka resýrstarynyń kólemin arttyrýǵa qatysty aýqymdy bastamalar da bar.
«Astana men Máskeý Eýrazııa ekonomıkalyq odaǵy aıasynda tabysty jumys istep jatyr. Qazir bul qurylym Eýrazııa keńistigindegi ekonomıkalyq yqpaldastyqtyń mańyzdy tetigine aınaldy jáne halyqaralyq deńgeıde abyroı-bedelge ıe boldy», delingen «Izvestııa» gazetinde jarııalanǵan maqalada.
Eske salaıyq, bıyl Eýrazııa ekonomıkalyq odaǵyn qurý týraly shartqa 10 jyl toldy.
«Qazaqstan men Reseı jahandyq básekege qabiletin arttyrý úshin áýel bastan jan-jaqty yqpaldastyq pen baılanysty dáıekti túrde nyǵaıtýǵa umtyldy. Sol sebepti, birlestik qurý týraly bastama kóterip, osy uıymnyń negizin qalady. Sodan beri Eýrazııa ekonomıkalyq odaǵy oǵan múshe memleketterdiń ekonomıkalyq saıasatyn ıntegrasııalaý jáne ózara saýda-sattyqty damytý úderisi tabysty júzege asyp jatqan asa mańyzdy platforma retinde óziniń tıimdiligin kórsetti», dep jazdy Memleket basshysy.
