«Abaı oblysy – ekonomıkasynyń negizgi bóligin agrarlyq sektor quraıtyn aımaqtardyń biri. Agroónerkásip salasynda oń ózgeris baıqalyp, ónim kólemi artty. О́ndiriske jańa tehnologııalar engizilip, tıimdilikti arttyrýǵa baǵyttalǵan qadamdar jasalyp jatyr. Bul, árıne osy zalda otyrǵan, ata kásippen shuǵyldanatyn ózderińizdiń eńbekqorlyqtaryńyz ben joǵary kásibılikterińizdiń arqasynda múmkin bolǵanyn erekshe atap ótý qajet», dedi Nurlan Uranhaev.
Atalǵan forým aıasynda qonaqtar óńirdiń aýyl sharýashylyǵy ónimderi usynylǵan kórmeni tamashalady. Jalpy, bıylǵy jyldyń 10 aıynyń qorytyndysynda oblys dıqandary aıtarlyqtaı tabysqa jetti. Aýyl sharýashylyǵy ónimderiniń jalpy kólemi 335,9 mlrd teńgeni quraıdy. Mal sharýashylyǵynda 110,7% ósim baıqalady.
Forýmda oblystyq aýyl sharýashylyǵy basqarmasynyń basshysy Ertaı Qýanbaev sharýalarǵa memlekettik qoldaý kórsetilip, aýyl sharýashylyǵy óniminiń ósimin arttyrý jóninde birqatar jumystyń atqarylyp jatqanyn aıtty. Bıyl agroónerkásip keshenin sýbsıdııalaýǵa 17,5 mlrd teńge bólinip, 2 myńnan astam aýyl sharýashylyǵy taýar óndirýshilerin qoldaýǵa múmkindik jasaldy. 10 aıdyń qorytyndysyna sáıkes mal sharýashylyǵy salasyndaǵy et, sút óndirisiniń ósýi tıisinshe 102,8%, 102,6%-dy qurady.
Forým barysynda sala úzdikteri memlekettik nagradalarmen marapattaldy. Prezıdent Jarlyǵymen Aıagóz aýdanynyń «Atasý» sharýa qojalyǵynyń jetekshisi Sáýle Hasenqyzy, Aqsýat aýdanynyń «Yqybaı» sharýa qojalyǵynyń jetekshisi Qadyrbek Elýbaıuly «Qurmet» ordenimen, Borodýlıha aýdanynyń «Trýd» sharýa qojalyǵynyń mehanızatory Aleksandr Grıgorevıch, Abaı aýdanynyń «Dinmuhamed» sharýa qojalyǵynyń jylqyshysy Saǵdat Zaqratuly III dárejeli «Eńbek dańqy» ordenimen, Kókpekti aýdanynyń «Elim-aı Kókpekti» jaýapkershiligi shekteýli seriktestiginiń mehanızatory Erlan Aqylbaev «Eren eńbegi úshin» medalimen marapattaldy.
Buǵan qosa aýyl sharýashylyǵy salasynda eleýli eńbek etken qyzmetkerlerge «Eńbek ardageri» medali, «Aýyl sharýashylyǵy salasynyń úzdigi» tósbelgisi, Aýyl sharýashylyǵy mınıstrliginiń Qurmet gramotalary tabystaldy.
Abaı oblysy
