Forýmǵa óz salasynda tabysqa jetken bilikti jastar qatysty. Jıynnyń alǵashqy bólimi jas mamandardy jigerlendirý, qanattandyrý baǵytyna arnaldy. Onda olar óz tájirıbelerimen bólisip, jetistikteri týraly áńgimeledi. Al ekinshi bólim – mamandardyń kásibı quzyrettiligin arttyrýǵa baǵyttalǵan sheberlik sabaǵyna jalǵasty.
Jıynda jas pedagogter bilim berý úderisine ınnovasııalyq ádis-tásilderdi engizýge baǵyttalǵan trenıngter men tájirıbelik jumystarǵa aralasty. Sabaq barysynda oqytý ádistemesin jetildirý, zamanaýı tehnologııalardy tıimdi qoldaný jáne oqýshylardyń tanymdyq qyzyǵýshylyǵyn arttyrý joldary talqylandy. Qatysýshylar matematıkalyq stıldegi kreatıvti tásilderdi, aǵylshyn tili sabaqtarynda jasandy ıntellektini qoldanýdyń tıimdiligin, orta synyp oqýshylaryna kórkem shyǵarmany oqytýda sıfrlyq tehnologııalardy paıdalaný joldaryn sarapqa saldy.
Sonymen birge ınklıýzıvti bilim berý jaǵdaıynda oqý úderisin beıimdeý, oqýshylardy olımpıadaǵa daıyndaý strategııalary jáne STEAM negizindegi ınjenerııa men dızaındaǵy ınnovasııalyq sheshimderdi ázirleý tásilderi boıynsha tájirıbe almasyp, kásibı biliktilikterin damytty.
Bıyl úshinshi ret ótip otyrǵan is-sharaǵa oblystyq bilim mekemelerinen 200-ge jýyq jas pedagog qatysyp, biligi men bilimin tolyqtyrdy. Qatysýshylar forýmnan óz salalaryndaǵy jańa ádis-tásilderdi meńgerip, kásibı tájirıbelerin jetildirýge arnalǵan qundy aqparat pen ıdeıalar aldy. Forým jas mamandardyń ózara tájirıbe almasý alańyna aınalyp, pedagogıkalyq sheberlikterin damytýǵa serpin berdi.
Abaı oblysy
