«Fılmniń bıýdjeti shaǵyn ǵana boldy. Akterler kınoǵa tegin túsýge kelisti desek te bolady. Avtorlyq kınoǵa qoldaý kórsetkeni úshin olarǵa óz alǵysymdy bildiremin», dedi fılmniń rejısseri Shárıpa Orazbaeva.
Fılmde baıandalǵan oqıǵa Shárıpanyń jaqyn qurbysynyń ómirine negizdelgen. Bul tek kıno ǵana emes, rýhtyń shynaıy dramasy. Fılmde jalǵyz qalyp, ınternatta ósken qyzdyń qıyndyqqa toly ómiri kórsetiledi.
«Qurbym taǵdyrdyń túrli synaqtaryn bastan keshken. Osydan soń ol kúrdeli psıhologııalyq qıyndyqtarǵa tap boldy. Qazir ol únemi ózin qubyjyq retinde elestetedi. Fılmniń sońynda dál osy sátti kórsetýge tyrystym. Sebebi biz ózimizdi qubyjyqqa aınaldyramyz», deıdi Orazbaeva.
Alaıda «Tul» jeke adamnyń ómiri ǵana emes, tutas Qazaqstandy sıpattaıtyn týyndy. Qańtar oqıǵasynyń kadrlary fılmdi erekshe atmosferaǵa bóledi. Osylaısha rejısser óz azamattyq ustanymyn kórsete aldy.
«Qańtar oqıǵasy barlyǵymyz úshin aýyr jáne qaıǵyly taqyryp. Fılmde ony kórsetý arqyly bizge neniń mańyzdy ekenin aıtqym keldi», deıdi otandyq rejısser.
Fılmniń ataýy «Tul». Bul tereń maǵynaly sóz. Sondaı-aq kartınanyń ishki mánin asha alady. Shárıpa Orazbaevanyń aıtýynsha, qazaq tilinde bul sóz tek «jetim» degendi ǵana emes, sonymen birge adamnyń qoǵamnan tolyq oqshaýlanǵanyn, onyń aýyrtpalyǵyn eshkim túsine almaıtyndyǵyn bildiredi.
«Tul» fılmi tek jetim qyz týraly emes. Bul adamnyń ishki jan dúnıesindegi arpalys. Men osy sezimdi berýge tyrystym», deıdi rejısser.
XVII Halyqaralyq «Eýrazııa» kınofestıvalinde fılmniń tusaýkeseri ótti. Zalda ıne shanshar oryn tabylmaı, týyndy kórermenderdiń ystyq yqylasyna ıe boldy. Jınalǵan qaýym kórsetilimnen keıin rejısser men akterlerden ózderin mazalaǵan suraqtardyń jaýabyn aldy.
«Tul» fılmi resýrstardyń azdyǵyna qaramastan sapaly kıno túsirýge bolatynyn dáleldedi. Ol kórermenderdiń jan dúnıesin baıytyp, oıyn terbep, sezimin qozǵaıdy.
Dástúrli festıvaldiń negizin qalaýshy jáne uıymdastyrýshy – QR Mádenıet jáne aqparat mınıstrligi. Kınofestıvaldi tikeleı uıymdastyrý Almaty qalasy ákimdiginiń qoldaýymen Sháken Aımanov atyndaǵy «Qazaqfılm» ulttyq kınostýdııasyna júktelgen.
Aıta keteıik, is-sharaǵa KAZ Minerals ken óndirý kompanııasy, Sarens Kazakhstan, Eurasian Resources Group (ERG), Salem Entertainment, Kinopark Theatres kınoteatrlar jelisi, Astana Motors, «Qazaqtelekom» AQ jáne A-Event KZ demeýshilik etti.
