Memleket basshysy Qasym-Jomart Toqaev Qazaqstan halqyna Joldaýynda 2025 jyldy «Jumysshy mamandyqtar jyly» dep jarııalap, óndiris, aýyl sharýashylyǵy jáne basqa da salalarda jumysshy mamandyqtardy qoldaý qajettigin aıtty. Bul qadam jumysshy mamandyqtarynyń bedelin arttyryp, eldiń ekonomıkalyq turaqtylyǵyn nyǵaıtýdy kózdeıdi. Osy maqsatta ótkizilgen jıynǵa óńirdegi óndiristik, kólik-logıstıkalyq, munaı-gaz kompanııalarynyń 100-ge jýyq qyzmetkeri, bıznesmender, ulttyq kompanııalar men kásipodaqtar ókilderi qatysty.
«Jastar – memlekettiń qozǵaýshy kúshi. Demek olarǵa árdaıym qoldaý kórsetý, baǵyt-baǵdar berý mańyzdy. Munaıly óńirde mádenı, sporttyq, ıntellektýaldyq jıyndarǵa belsendi qatysyp júrgen, jasy 35-ke deıingi otandastarymyz az emes. Tipti keshegi kóktemgi sý tasqyny kezinde de áskerılermen birge eriktiler sapyn toltyryp, ıgi isten qalys qalmady. Buǵan alǵysymyz sheksiz», dedi ishki saıasat basqarmasy basshysynyń orynbasary Álisher Janǵalıev.
Slet aıasynda óndiris salasynda tabysqa jetken jandarmen jáne kompanııa basshylarymen motıvasııalyq kezdesý ótti. Jastar ózekti taqyryptar tóńireginde pikir almasyp, jeke bastamalaryn júzege asyrýǵa qajetti aqparat aldy. Sonymen qatar qatysýshylarǵa arnalǵan strategııalyq sessııa uıymdastyryldy.
«Elde jumysshy mamandyqtaryna tapshylyq óte joǵary. Oǵan jastardyń basym bóligi qyzyǵýshylyq tanytpaıdy. Kúni keshe ǵana Eńbek jáne halyqty áleýmettik qorǵaý mınıstrligi 2030 jylǵa qaraı 400 myńnan asa jumysshy maman qajet bolady degen statıstıkalyq esepti jarııalady. Sondyqtan óndiristegi kompanııa ókilderi mundaı kezdesýlerge qatysyp, jas býynmen tanysyp, sóılesý arqyly olardyń suranysyn bile alady», dedi qatysýshy Naıl Hakımov.
