Sút ónimi óndirisin kóbeıtýmen qatar jańa jumys oryndarynyń ashylýy jergilikti jurt úshin aq túıeniń qarny jarylǵan qýanyshqa aınalǵan. Aýylda qol qýsyryp qarap otyrǵan adam joq. Eńbekaqylary ýaqtyly ári qomaqty tólengennen keıin túgelge jýyq ortaq iske óz úlesterin qosyp jatyr. Keıbir jerlerdegideı týǵan jerdiń topyraǵynan údere kóshý baıqalmaıdy. Belsendi is-qımyldary arqyly el eńsesin kóterýge septigin tıgizip kele jatqan seriktestik óńirdegi osy tektes aýyl sharýashylyǵy kásiporyndaryna elge degen janashyrlyǵymen, qamqorlyǵymen úlgi. Endi osy tolaıym tabysty sál ǵana taratyp aıtalyq. О́tken jyly qolǵa alynǵan ınvestısııalyq joba kezeń-kezeńimen júzege asyrylyp, 400 bas iri qaraǵa shaqtalǵan fermanyń qurylysy aıaqtaldy. Quryltaıshylar jobany tolyq aıaqtap shyǵý úshin ózderiniń 700 mln teńge qarajatyn jumsady. Qazir kompanııa «Kókshe» áleýmettik-kásipkerlik korporasııasynan 1 mlrd 87 mln teńge nesıe alyp, ekinshi fermanyń qurylysyn bastap ketti. Jańa ferma da 400 bas qara malǵa laıyqtalǵan.
О́ndiris órisiniń keńeıýi mal súmesimen kún kórip otyrǵan jergilikti jurtqa da paıdaly. Tolymdy tabysy bar jańa jumys oryndary ashylady. Bireýi mal baqsa, bireýi sıyr saýyp, adal eńbekterimen áleýmettik-turmystyq jaǵdaıyn jaqsartady. Qazaqsha aıtqanda, kádimgi kúnkóris kózi.
Sút ónimderin óńdeýdi jolǵa qoıý úshin jańa tehnologııany paıdalanyp otyr. Tórt túlik maldyń babyn tabý jergilikti jurt úshin tańsyq sharýa emes. Al ónimin óńdeý aıryqsha mańyzdy másele. Burynǵydaı «qoıyn qurttap, sútin urttap» barǵa qanaǵat dep júre berýge bolmaıdy. Bar dúnıeni uqsata bilgen jón. Adyrly, tastaq, shóbi qunarly ólke qara mal úshin meılinshe qolaıly. Áıtse de, tyńǵa túren salǵan ánebir jyldary quıqaly óńirdiń quty qashqany da shyndyq. Sondyqtan, mal azyǵyn meılinshe túrlendirip, mol daıyndamaı, qyr asý qıyndaı bermekshi. Máseleniń mánisin jaqsy túsingen seriktestik «sıyrdyń súti tilinde» ekenin jaqsy biledi. Mal baǵý ádisin de ǵylymı negizde jetildirip, tolymdy etýde.
Búgingi kúni joǵary sapaly ónim óńdeıtin túrik qurylǵysy alynbaq. Jalpy qunynyń toqsan paıyzy tólenip te qoıyldy. Osy aıdyń sońyna deıin sút ónimderin óńdeıtin sheteldik qurylǵy tolyq jetkizilmek. 410 bas gereford asyl tuqymdy sıyryna kelisimshart jasaldy. Alǵashqy 30 bas iri qara jetkizilip, karantınge qoıylǵan. Aldaǵy jyldyń alǵashqy jartyjyldyǵynda tolyq jetkizilmek. Osylaısha, mal tuqymy asyldandyrylyp, sapasy jaqsartyla túspek.
Seriktestik senimdi qadam jasaýmen qatar aldaryna bıik maqsat ta qoıyp otyr. Nátıjege qol jetkizetindigi sózsiz. О́ıtkeni seriktestik basshysy Erlan Alın iskerligimen tanylǵan azamat. Tájirıbeli basshy aýyl sharýashylyǵynyń jiligin shaǵyp, maıyn ishken maıtalman maman ǵana emes, sonymen birge, týǵan jerdiń tútinin túzý ushyrýǵa aıanbaı at salysyp júrgen janashyr jan. Eńbegine qaraı úshinshi dárejeli «Eńbek dańqy» ordenimen jáne birneshe medalmen marapattalǵan, Jarqaıyń aýdanynyń qurmetti azamaty.
Jarqaıyńdyqtar úshin Erlan Alınniń tabandy eńbegi ádemi úlgige aınalǵan. Bul tóńirekte sharýashylyq týraly suraı qalsańyz, halyqtyń deni osy seriktestikti maqtana aýyzǵa alary sózsiz. Aýa raıy kúrt ózgerip, keı jyldary qyryn qabaq tanytsa da, jurtty jaqsylyqqa bastap, adal eńbekke uıymdastyryp, kúsh-qýat, qajyr-qaıratyn bir arnada toǵystyra biletin jáne bolashaǵyn boljap, keleshegin kemel etýge tyrysatyn eńbekker jannyń beınesi naǵyz búgingi kúnniń qaharmany keıpinde. Bir qyzyǵy, seriktestik basshysynyń ótkenine úńilseńiz, mamandyǵy ózge taraptan eken. Áýeli dene tárbıesiniń muǵalimi bolǵan, shańǵy sportymen belsendi aınalysqan. Áskerı boryshyn ótep kelgennen keıin jattyqtyrýshy bolyp eńbek etken. Múmkin qıyndyqtan qaıyspaý, jol-jónekeı kezdesken bógesindi buzyp-jaryp, alǵa umtylý sportta qalyptasqan minez be eken?
Áýeli «Saıan» sharýa qojalyǵyn qurypty. Maldy óz tólinen ósirip, qajetti tehnıkany jınaqtaǵan, eskini jamap-jasqaǵan. Tórt qubylasyn tegistegen soń «Temirlan» jaýapkershiligi shekteýli seriktestigin qurǵan. Búgingi bosaǵasyna bereke bitken ujymnyń alǵashqy bastaýy osylaısha qalyptasqan. Keıin Erlan Qınýarbekuly istiń kózin taba bilgen ilkimdiliginiń arqasynda sharýasyn myǵymdaı túsken. Igiligin el kórip otyr. Seriktestik ónimderi sapasy jaǵynan joǵary baǵalanady. Tutynýshylar tarapynan ókpe-naz aıtylǵan emes. Shalǵaıdaǵy shaǵyn aýyldyń shyraıyn keltirip otyrǵan da osy. Jalǵyz tórt túlik mal ǵana emes, tyń dala tósinde aqyq dán de ósiredi. Egistik alqaby 45 myń gektardy quraıdy. Keshegi keńes zamanyndaǵy eki keńshardyń jeri. Osynshama jerdi óńdeý úshin qýatty tehnıka, qajyrly jumys kúshi kerek ekendigi belgili. Bolashaqtyń jaıyn oılaǵan sharýashylyq basshysy aýyl sharýashylyǵyna qajetti tehnıkany júz paıyz jańǵyrtqan.
«Temirlan» seriktestigi qazir beri qoıǵanda aýdandaǵy, ári qoıǵanda óńirdegi etek-jeńi keń pishilgen iri aýyl sharýashylyǵy kásiporny sanatynda. Seriktestik óz sharýasyn yjdaǵattaýmen qatar, aýdannyń áleýmettik-turmystyq jaǵdaıynyń jaqsarýyna kóp kómek kórsetti. Eldi mekenderdiń jolyn jóndeýge, bilim men mádenı nysandaryp jańǵyrtýǵa at salysyp keledi.
Bıyl tórt birdeı ınvestısııalyq jobany qolǵa alyp, júzege asyryp jatyr. Egin sharýashylyǵynda tabysqa qol jetkizý úshin 340 gektar alqapty sýarmaly egistikke kóshirý maqsatynda ıtalıandyq qurylǵy satyp alǵan. Jelilik elevatorǵa sapasy myqty túrik qurylǵysyn ornatqan.
Seriktestik tabysqa qol jetkizýmen qatar, óz aýylymen birge tutas aýdannyń da ahýalyn jaqsartýǵa septigin tıgizip keledi.
Aqmola oblysy,
Jarqaıyń aýdany
