Egin jınaýda oblystaǵy dándi daqyldardyń jalpy alańy 169,2 myń gektardy qurasa, maıly daqyldar 23,7 myń gektarǵa egildi. Sondaı-aq 10,4 myń gektar kartop, 15,5 myń gektar kókónis, 1,8 myń gektar baqsha daqyldary, 0,2 myń gektar qant qyzylshasy jáne 198,4 myń gektar azyqtyq daqyldar qambaǵa tústi.
Júgeri egilgen alań 50,4 myń gektardy quraıdy, ótken jylmen salystyrǵanda bul kórsetkish 4,3 myń gektar azaıǵan. Qazirgi ýaqytta 36 myń gektar (71,3%) júgeri jınalyp, ónimdilik gektaryna ortasha 70,6 sentnerdi qurady. Bul kórsetkish boıynsha jalpy 254,9 myń tonna júgeri jınaldy, al jalpy jınalǵan ónim kólemi 378 myń tonnadan asady degen jospar bar.
Almaty oblysynda jyl saıyn jınalǵan júgeri men basqa da daqyldardy qabyldap, óńdeýmen 3 kásiporyn, atap aıtsaq, Panfılov aýdanyndaǵy «Jarkent krahmal-patoka zaýyty» JShS, Qarasaı aýdanyndaǵy «AzııaAgroFýd» AQ jáne Jambyl aýdanyndaǵy «Kók Teńiz» JShS aınalysady.
Qazir «AzııaAgroFýd» AQ zaýyty 25 myń tonna júgeri qabyldady, ortasha baǵasy 50 myń teńge kóleminde. «Kók Teńiz» JShS 62-65 teńgeden 5 myń tonna júgeri qabyldaǵan, al jeltoqsan aıynyń ortasyna deıin taǵy 15 myń tonna júgeri qabyldaýdy josparlap otyr. Oblysta qus fabrıkalary kılogramyna 74 teńgeden 800 tonna júgeri satyp aldy.
Almaty oblysynda dándi daqyldardy saqtaý, keptirý jáne qabyldaý jumystaryn atqaratyn 3 lısenzııalanǵan kásiporyn bar. Olar – «Baıserke Agro» JShS, «Agro-food» JShS jáne «Baltabaı Dán» JShS. Sonymen qatar Eńbekshiqazaq aýdanyndaǵy «Nanıev K.I», «Býdan», «Haıdarov» ShQ, Jambyl aýdanyndaǵy «Oljas», «Shkaev» ShQ astyq keptirýmen aınalysady.
Bıyl Almaty oblysy kartop pen kókónis ónimderinde de kóńil toǵaıtarlyq nátıje kórsetti. Osy jyly 741 myń tonna kartop jáne kókónis-baqsha ónimi jınaldy. Bul oblystyń ishki naryǵyn tolyqtaı qamtamasyz etý úshin jetkilikti. Kartoptyń ortasha baǵasy – 213 teńge, pııaz – 146 teńge, sábiz 163 teńgeden baǵalanǵan. Pııaz óniminiń kólemi ishki naryqtyń qajettiliginen eki ese artyq. Qazirgi kezde oblys 50,6 myń tonna pııaz jınady, onyń 24,4 myń tonnasy ishki tutynýǵa, 8,1 myń tonnasy maýsymaralyq kezeńge saqtalǵan. Oblysta pııazdy saqtaý úshin 29 kókónis qoımasy iske qosylǵan, olardyń jalpy saqtaý syıymdylyǵy 57,2 myń tonnaǵa teń. Sonymen qatar sharýashylyqtar pııazdy ýaqytyly ótkizý úshin iri saýda jelilerimen, sýpermarkettermen kelisimsharttar jasasyp jatyr.
2024 jylǵa arnalǵan sý únemdeıtin tehnologııalardy engizý jospary oblysta 42,6 myń gektardy quraıdy. Búginde sý únemdeıtin tehnologııalarmen qamtylǵan alań 43,1 myń gektardy nemese 101,3%-dy quraıdy, onyń ishinde tamshylatyp sýarý – 18,4 myń gektar, jańbyrlatyp sýarý – 24,7 myń gektar (jańa alań 22,5 myń gektar, onyń ishinde tamshylatyp sýarý – 8,8 myń gektar, jańbyrlatyp sýarý – 13,7 myń gektar).
Sonymen qatar oblysta sý únemdeıtin tehnologııalardy satyp alý múmkindigin arttyrýǵa tamshylatyp sýarý jabdyqtaryn óndiretin zaýyt jumys isteıdi. «Jibek joly» JShS bastapqy kezeńde sý únemdeıtin tehnologııalarǵa 10 mıllıon dollar ınvestısııalaýdy josparlap otyr. Kompanııa tamshylatyp sýarý júıesine arnalǵan quramdas bólikterdi shyǵarýmen aınalysady. О́ndiriske bólingen jer ýchaskesiniń aýmaǵy – 8 gektar.
Oblystyń agrarlyq sektorynda ishki naryqty turaqty túrde qamtamasyz etýge tıimdi logıstıka men saýda jelilerimen baılanys ornatý qajet. Sonymen qatar egin jınaý jumystaryna qajetti tehnıkanyń tıimdi paıdalanylýy, astyqty saqtaý ınfraqurylymynyń damýy egin sharýashylyǵynyń turaqty damýyna yqpal etedi.
Almaty oblysy
