Sýrette: bylyqqa batqan bazar.
Atalǵan jaǵdaıǵa baılanysty Qonaev qalasynyń ákimi Ashat Berdihanovtyń tapsyrmasymen monıtorıngtik top quryldy. Onyń quramy veterınarlyq ınspeksııa, zerthana, jer qatynastary, kásipkerlik jáne ishki saıasat bóliminiń mamandarymen tolyqty.
Senbi kúnderi bul bazarda jármeńke uıymdastyrylady. Saýda qyza túsetin osy kúni monıtorıngtik top bazar jumysyn jiti baqylap, birneshe kemshiliktiń baryn anyqtady.
Aıtalyq, aldymen «Alǵa» bazary demalys kúnderi jármeńke ótkizý oryny retinde jergilikti atqarýshy organmen bekitilmegen. Alaıda, bazar basshylyǵy bul faktini teriske shyǵardy.
Ekinshiden, iri qara maldyń eti (ókpe-baýyr, qaryn maıy, sıraqtar), shujyqtar, sút ónimderi ashyq aspan astynda satylǵan. Bul sanıtarlyq normalarǵa sáıkes kelmeıdi.
Úshinshiden, merzimi ótken shujyqtar men túrli táttilerdi, azyq-túlikterdi «úı janýarlaryna arnalǵan taǵam» retinde satý derekteri tirkeldi. Sondaı-aq veterınarlyq anyqtamasy joq 2 satýshyǵa aıyppul salynǵan. Satylymdaǵy qus etteri men jumyrtqalardyń tıisti qujattary da bolmaǵan. Synamalar zerthanalarǵa jiberilip, nátıjesi anyqtalatyn bolady.
«Monıtorıngtik top bazar basshylyǵyna qatysty turaq sanynyń jetkiliksizdigi, satýshylarǵa jaǵdaı jasalmaǵany, jabyq pavılondardyń joqtyǵy, bazar aýmaǵy standarttarǵa sáıkes kelmeıtini (qatty jabynmen jabylýy tıis) týraly uıǵarym shyǵardy. Monıtorıngtik toptyń bul aqparaty ary qaraı sharalar qabyldaý úshin sanıtarlyq-epıdemıologııalyq baqylaý basqarmasyna jiberiledi. Sonymen qatar ákimdik bul nysandy talaptarǵa sáıkestendirý úshin birqatar sharalardy qolǵa almaq», deıdi Qonaev qalasy ákimdiginiń baspasóz qazmeti.
Aıta keterligi, bazar turǵan jer 11 ýchaskege bólingen, ıeleri de ártúrli. Qysqy maýsymda senbi kúngi jármeńkede 100-120 orynda saýda jasalady. Jazdyń kúni bul kórsetkish 150-ge jetedi. Satýshylardyń kóbi Alataý qalasynan, Talǵar aýdanynan keledi. Arasynda qalalyqtar da bar. Apta saıyn jármeńkege 40 tonna kartop, 50 tonna jýa, 20 tonna sábiz, 20 tonna qyryqqabat ákelinedi.
Almaty oblysy,
Qonaev qalasy
