Foto: Astana qalasy ákimdigi
Reıd barysynda monıtorıngtik top Nura aýdanynyń iri turǵyn úı keshenderinde ornalasqan kásipkerlik nysandaryn teksergen. Reıd nátıjesinde nasybaı men snıýs úsh dúkennen tabylǵan.
Polısııa qyzmetkerleri jalpy somasy 25 myń teńgege shamamen 40 qorap nasybaı men 20 qorap snıýs tárkilegen. Dúken ıeleri ákimshilik jaýapkershilikke tartylyp, olarǵa QR ÁQBtK-niń 196-babyna sáıkes 92 300 teńge (25 AEK) aıyppul salynǵan.
«Biz jaman ádetterdiń aldyn alý qaǵıdattaryn ustana otyryp, jastardyń osy ónimge qoljetimdiligin shekteýge tyrysamyz. Buzýshylyqtar úshin qatań jaýapkershilik sharalary, sonyń ishinde iri aıyppuldar qarastyrylǵan. Kásipkerlerdiń esine salǵym keledi: veıp, nasybaı jáne snıýs satýǵa tyıym salýdy saqtaý – bul zańnyń talaby ǵana emes, sonymen qatar qoǵam aldyndaǵy moraldyq jaýapkershilik. Nura aýdanynda mundaı monıtorıngtik is-sharalar únemi ótkizilip turady. Jyl basynan beri 230-ǵa jýyq dúken tekserildi, biz bul jumysty jalǵastyramyz», dedi Nura aýdany ákimi apparatynyń kásipkerlik bóliminiń bas mamany Batyrhan Janpeıisov.
Buzýshylyqtardy anyqtaý boıynsha reıdter jastar arasynda jaman ádetterdiń aldyn alýǵa jáne kásipkerlerdiń zańnamany saqtaǵany úshin jaýapkershiligin arttyrýǵa baǵyttalǵan.
