Mádenıet jáne aqparat mınıstrliginiń qoldaýymen Ulttyq mýzeıde Qyzylorda oblystyq tarıhı-ólketaný mýzeıiniń 85 jyldyǵy aıasynda «Syr óńiri – Túrki órkenıetiniń altyn besigi» atty kórmeniń saltanatty ashylý rásimi ótti.
Is-sharaǵa Mádenıet jáne sport mınıstrligi Mádenıet komıtetiniń tóraǵasy Kúmis Seıitova, Qyzylorda qalasy ákiminiń orynbasary Shahmardan Baımanov, elordalyq qalamgerler men ánshiler qatysty.
– Syr óńiriniń rýhanı jádigerlerin nasıhattaý maqsatynda 2023 jyly Astana qalasynyń 25 jyldyǵyna arnalǵan oblysymyzdyń elordada óner kúnderi ótkizilse, 2024 jyly Almaty qalasynda da Syr eliniń mádenı kúnderi ótkizilgen bolatyn. О́ńirler arasyndaǵy rýhanı baılanysty arttyrý, tájirıbe almasýdy kózdeıtin bul ıgi bastamalar búginde elordamyzda júzege asyp jatyr. Mine, kórmege arheologııalyq qazba jumysy kezinde tabylǵan eksponattar, saq órkenıetine jatatyn Shirik Rabattan tabylǵan altyn japsyrmalar, sonymen birge S.Aıtbaev atyndaǵy kórkemsýret galereıasy qorynda saqtalǵan qylqalam sheberleriniń 40-qa jýyq kartınasy kópshilik nazaryna usynylmaq, – dedi Shahmardan Asqaruly.
Munan soń jyrshy, termeshi, «Daryn» Memlekettik jastar syılyǵynyń laýreaty Kúnsulý Túrikpen «Tolǵaý» termesin oryndap, kórermenge Syr ónerpazdarynyń murasynan shashý shashty. Kelgen qonaqtar kórme zalyna ótip, tarıhy tereń óńirdiń etnografııalyq buıymdaryn, mýzeı qoryndaǵy teńdesi joq zergerlik buıymdar kolleksııasyn tamashalady. Sonymen qatar kórmege tarıhı tulǵalar Buqarbaı batyr Estekbaıulynyń, Qalmuhammed ıshan Maralulynyń, Er Seıitpenbet áýlıeniń, Serdaly bı Bekshoraulynyń, Qulboldy ıshan Sultanulynyń qarý-jaraq, mór, kitap, qoljazba, shejire sııaqty paıdalanǵan jádigerleri ákelingen. «Syǵanaq hanshaıymy» rekonstrýksııasy qonaqtardyń nazaryn aýdardy. Marjan kózdi altyn syrǵalar, kógildir aqyq kózdi sılındr formasyndaǵy tumar, tamshy túrindegi túımeler jáne marjan monshaqtardyń túpnusqa kolleksııasy, qysh ydystar men glazýrli qaptamalar, ártúrli qumyralar kórermen kózaıymyna aınaldy.
