Sotqa T. esimdi zeınetker úıdi syıǵa tartý týraly kelisim-shartty jaramsyz dep taný úshin júgingen. Tergeý barysynda onyń aýyr jaǵdaıǵa qaramastan, kelisimge májbúr bolǵany anyqtaldy.
2024 jyly T. ókpe pnevmonııasy, mı qan aınalymynyń buzylýy jáne basqa da aýyr dıagnozdarmen aýdandyq aýrýhananyń jansaqtaý bóliminde jatqan. Osy kezde qyzy A.-nyń talabymen áıel aýrýhanadan beısanalyq kúıde shyǵarylyp, Astana qalasyna jetkizilgen.
Qyzy osy jaǵdaıdy paıdalanyp, T.-nyń jalǵyz turǵyn úıin kámeletke tolmaǵan ulyna syıǵa tartý kelisimin rásimdegen. Nátıjesinde, T. óziniń úıi men jer ýchaskesinen aıyrylǵan.
«Sot talqylaýy barysynda kelesi derekter negizge alyndy: T.-nyń densaýlyq jaǵdaıy aýyr bolǵan, ol kelisim-shart jasalǵan sátte óziniń is-áreketin túsinýge qabiletsiz edi; jaýapkerler T.-nyń densaýlyq jaǵdaıyn paıdalanyp, onyń erkinen tys áreket etken; bul kelisim T.-nyń menshik quqyǵyn óreskel buzdy», delingen habarlamada.
Sot azamatsha T.-nyń paıdasyna sheshim shyǵaryp, turǵyn úı men jer ýchaskesin qaıtarýǵa qaýly etti.
