Soltústik Qazaqstanda álem chempıonatyna qatysatyndar anyqtaldy

PETROPAVL. 17 maýsym. Elimizdiń ár oblysynan jınalǵan gir kóterýshiler men qol kúresiniń sheberleri birneshe kún boıy kúsh synasyp, eń myqtylary Irlandııa men Malaızııada ótetin álemdik dodaǵa beriletin joldamalardy utyp aldy. Bul týraly oblystyq dene shynyqtyrý jáne sport basqarmasy habarlady. Gir tasyn kóterýshiler arasynda barlyq júldeli oryndardy alań ıeleri ıelenip, jalpy komandalyq esepte de úzdik shyqty. Ekinshi, úshinshi oryndarǵa qostanaılyqtar men pavlodarlyqtar jaıǵasty. О́z salmaqtary boıynsha jeńistiń eń bıik tuǵyryna kóterilgen Elena Kostenko (58 kg.), Natalıa Nohrına (68 kg.), Mıhaıl Vologodskıı (73 kg.) jáne Vıtalıı Dıdenko (95kg-nan joǵary) endi qarasha aıynda Irlandııada Qazaqstannyń namysyn qorǵaıtyn bolady. Armrestlıngshiler arasynan jalpykomandalyq esepte Jambyl oblysynyń sportshylary jeńimpaz atandy.  Almatylyqtar men ońtústikqazaqstandyqtar ekinshi, úshinshi oryndardy bólisti. Al qyrkúıek aıynda Malaızııada ótetin álemdik jarysqa Soltústik Qazaqstan oblysy atynan Vıktorııa Frolova (70 kg-ǵa deıin), Iýrıı Voblıkov (80 kg-ǵa deıin) jáne Pavel Lýkanın (90 kg-ǵa deıin) qatysady. О́mir Esqalı. Derek: Soltústik Qazaqstan oblystyq dene shynyqtyrý jáne sport basqarmasy. Sýret: egemen.kz