Sanjar Táshkenbaı (48 kg) men tájikstandyq Mehron Shafıev kezdesti. Eki boksshy da baryn salyp aıqasty. Desek te basymdyq bizdiń jigit jaǵynda boldy. Ol ekinshi raýndta qarsylasyn eseńgiretip te tastady. Jeńis Sanjardyń enshisine jazyldy. Sáken Bıbosynov (51 kg) oıda joqta ózbekstandyq Asylbek Jálılovten jeńildi. Mahmud Sabyrhan (54 kg) shrılankalyq Jaıanat Qumardy aıqyn basymdyqpen utty. Bul jekpe-jek ekinshi raýndta toqtatyldy. Muhamedsabyr Bazarbaıuly (63,5 kg) taılandtyq Somchaı Vongsývaǵa jol berdi. Saǵyndyq Toǵambaı (92 kg) О́zbekstannyń qazaǵy Madııar Saıdraqymovpen judyryqtasty. Bul básekede Saǵyndyqtyń baǵy jandy.
Jartylaı fınaldyq saıystardy qyzdar bastady. Bul básekelerde Vıktorııa Grafeeva (60 kg) taılandtyq Porntıp Býapty merziminen buryn utsa, Aıda Ábikeeva (63 kg) taǵy bir jergilikti boksshy Thananıa Somnýekke san soqtyrdy. Natalıa Bogdanova (70 kg) ýkraınalyq Anastasııa Chernokolenkony, Gúlsaıa Erjan (81 kg) ózbekstandyq Sohıba Rýzmetovany upaı sanymen jeńdi. Sonymen qatar asa aýyr salmaqta sportshylardyń az bolǵanyna baılanysty Eldana Tálipovanyń birden fınalǵa joldama alǵanyn esterińizge sala keteıik. О́kinishke qaraı, Áıgerim Sáttibaeva (48 kg) Farzona Fozılovaǵa (О́zbekstan), Jazıra Oraqbaeva (52 kg) Ferýza Qazaqovaǵa (О́zbekstan), Uljan Sársenbek (57 kg) Pýnravı Rýenroske (Taıland), Mılana Safronova (66 kg) Navbahor Hamıdovaǵa (О́zbekstan), Dıana Magaýıaeva (75 kg) Lına Vanǵa (Qytaı) jol berdi. Qorytyndysynda bes qyzymyz qola medaldy qanaǵat tutty.
Erler arasyndaǵy jartylaı fınal keshe ótti. Bul mejede Sanjar Táshkenbaı (48 kg) Kadzýma Aratakeni (Japonııa), Mahmud Sabyrhan (54 kg) Saravýt Sýkthetti (Taıland), Orazbek Asylqulov (57 kg) Lýndaa Gantýmýrdy (Mońǵolııa), Dýlat Bekbaýov (67 kg) Shýkrat Salomatovty (Tájikstan), Abylaıhan Júsipov (71 kg) Shohobjon Shúkirovti (Tájistan), Dıas Moljigitov (75 kg) Pavel Ilıýshany (Ýkraına), Bekzat Nurdáýletov (86 kg) Danııl Jasandy (Ýkraına), Saǵyndyq Toǵambaı (92 kg) Taımıao Lıýdi (Qytaı), Aıbek Oralbaı (+92 kg) Jahongır Zokırovti (О́zbekstan) utty. Al Erasyl Jaqpekov (80 kg) Turabek Habıbýllaevqa (О́zbekstan) ese jiberdi. Osylaısha, toǵyz jigitimiz fınaldyq saıysqa joldama aldy. Bas júldege tartys 11 jeltoqsanda ótedi.
